輕嘆一聲
《輕嘆一聲》Khin-thàn Tsi̍t-siann
馬句Má-kù(施聰猛Si Tshong-bíng, 泉州)
——————————————
哈!輕輕嘆一聲
hah! khin-khin thàn tsi̍t-siann
我的故事已過半
guá ê kòo-sū í kuè puànn
峰迴路轉啊毋認命
hong-huê lōo-tsuán–ah m̄ jīn-miā
心中若不平又按怎
sim-tiong nā put-pîng iū án-tsuánn
是非恩怨啊隨風散
sū-hui un-uàn–ah suî hong suànn
輕輕嘆一聲
khin-khin thàn tsi̍t-siann
總是毋敢越頭看
tsóng–sī m̄-kánn ua̍t-thâu khuànn
千淘萬漉啊向前行
tshian-tô bān-lo̍k–ah hiòng-tsiân kiânn
攏是紅塵過客者
lóng-sī hông-tîn kuè-kheh-tsiá
一曲江湖啊怎留名
it-khiok kang-ôo–ah tsuánn lâu miâ
多少往事步步驚
to-siáu óng-sū pōo-pōo kiann
滾滾風沙洗年華
kún-kún hong-sua sué nî-huâ
提起放下
the̍h-khí hòng-hā
人生兩字
jîn-sing nn̄g-jī
落筆怎樣寫
lo̍h-pit tsuánn-iūnn siá
多少感慨訴心聲
to-siáu kám-khài sòo sim-siann
滾滾海湧追逐行
kún-kún hái-íng tui-tiok kiânn
不諳世事
put-am sè-sū
風雲詭譎
hong-hûn kuí-kuat
奈何看不破
nāi-hô khuànn put-phuà
浪跡天涯姑不將
lōng-tsik thian-gâi koo-put-tsiong
荊棘路途坎坷影
king-kik lōo-tôo khám-khia̍t iánn
望天啊
bāng thinn–ah
輕輕嘆一聲
khin-khin thàn tsi̍t-siann
—
哈!人生已過半
hah! jîn-sing í kuè puànn
千淘萬漉向前行
tshian-tô bān-lo̍k hiòng-tsiân kiânn
