勤勞
《勤勞》Khîn-lô
鳳霞Hōng-hâ
——————————————
初出社會的朋友
tshoo tshut-siā-huē ê pîng-iú
選擇頭路斟酌揣
suán-ti̍k thâu-lōo tsim-tsiok tshuē
莫嫌少錢毋願蹛
mài hiâm tsió tsînn m̄-guān tuà
莫嫌艱苦受拖磨
mài hiâm kan-khóo siū thua-buâ
毋通看錢心來迷
m̄-thang khuànn tsînn sim lâi bê
毋通佮人去做歹學狼狽
m̄-thang kah lâng khì tsò-pháinn o̍h liông-puē
正當頭路趕緊做
tsìng-tong thâu-lōo kuánn-kín tsuè
才袂人看無目地
tsiah-bē lâng khuànn bô-ba̍k-tē
諸位兄弟佮姊妹
tsu-uī hiann-tī kah tsí-muē
理想職業揣一个
lí-sióng tsit-gia̍p tshuē tsi̍t-ê
認真拍拚有計畫
jīn-tsin phah-piànn ū kè-uē
毋通時常換頭家
m̄-thang sî-siông uānn thâu-ke
毋免怨嘆出生低
m̄-bián uàn-thàn tshut-sinn kē
牽牛的嘛會做皇帝
khan-gû–ê mā ē tsò hông-tè
跤踏實地做工課
kha ta̍h si̍t-tē tsuè khang-khè
拍拚以後做頭家
phah-piànn í-āu tsuè thâu-ke
