深深的祝福
《深深的祝福》Tshim-tshim ê Tsiok-hok
李鈴玉Lí Lîng-gio̍k
——————————————
風微微
hong bî-bî
吹窗邊
tshue thang-pinn
花開正當時
hue khui tsiànn-tong-sî
黃昏夕陽
hông-hun si̍k-iông
雖然媠
sui-jiân suí
無你伴身邊
bô lí phuānn sin-pinn
想起彼段好情意
siūnn-khí hit tuānn hó tsîng-ì
深情放袂離
tshim-tsîng pàng buē-lī
感謝你帶來
kám-siā lí tuà-lâi
予我奮鬥的勇氣
hōo guá hùn-tàu ê ióng-khì
雖然袂當伴在你身邊
sui-jiân buē-tàng phuānn tsāi lí sin-pinn
我也深深祝福你
guá iā tshim-tshim tsiok-hok lí
↓↓(口白)—(口白)—(口白)↓↓
男)
阿玉的啊
A-gio̍k–ê ah
過去你佮阮後生
kuè-khì lí kah gún hāu-sinn
咧相親相愛
teh siong-tshin siong-ài
為啥物今仔日的新娘
uī-sí-mih kin-á-ji̍t ê sin-niû
毋是你
m̄-sī lí
女)
阿伯,請你莫閣問矣,好毋
a-peh, tshiánn lí mài koh mn̄g–ah, hó–m̄
我是較苦提紅包
guá sī khah-khóo the̍h âng-pau
來祝福怹的呢
lâi tsiok-hok in ê neh
男)
是講,按呢也好啦
sī kóng, án-ne iā hó–lah
橫直阮囝
`huînn-ti̍t gún kiánn
曷毋是咧偌規矩
a̍h m̄-sī teh guā kui-kí
不時都欲去揣粉味
put-sî to beh khì tshuē hún-bī
一寡仔財產
tsi̍t-kuá-á tsâi-sán
攏予伊開開去
lóng hōo i khai-khai–khì
早慢某囝去寄人飼
tsá-bān bóo-kiánn khì kià-lâng tshī
女)
阿伯,你哪會按呢講咧
a-peh, lí ná ē án-ne kóng–leh
男)
這是見笑的代誌
tse sī kiàn-siàu ê tāi-tsì
阮囝是去傳著我的歹種子
gún kiánn sī khì thuân tio̍h guá ê pháinn tsíng-tsí
坦白共你講
thán-pe̍h kā lí kóng
阮囝媽咪啥物人
gún kiánn ma-mi siánn-mih lâng
𠊎嘛呣知
ngǎi mā m̌ dí
女)
阿伯,你哪會佇咧哭咧
a-peh, lí ná ē tī-leh khàu–leh
男)
啊!諾!今仔日請人客
ah! hiooh! kin-á-ji̍t tshiánn-lâng-kheh
應該愛歡喜
ing-kai ài huann-hí
來!來!來!
lâi! lâi! lâi!
鬥相共按奈人客
tàu-sann-kāng àn-nāi lâng-kheh
包五千的
pau gōo-tshing–ê
𤆬去上房啉麥仔酒
tshuā khì siōng-pâng lim be̍h-á-tsiú
包一千的
pau tsi̍t-tshing–ê
啉紅露
lim âng-lōo
六百箍以下的
la̍k-pah khoo í-hā–ê
NO啉
nóo-lim
彼前幾工仔乎
hit tsîng kuí-kang-á–honnh
予阿匹婆仔怹請乎
hōo A-phit-pô–á in tshiánn–honnh
偌無意思的喔
guā bô-ì-sù–ê ooh
共我𤆬去查某人桌做伙坐
kā guá tshuā khì tsa-bóo-lâng toh tsò-hué tsē
一寡仔囡仔
tsi̍t-kuá-á gín-á
也有紮紙袋仔
iā ū tsah tsuá-tē-á
也有提手巾仔
iā ū the̍h tshiú-kin-á
也有捾銅鼎
iā ū kuānn tâng-tiánn
菜出出來
tshài tshut–tshut-lâi
喔!敢若袂輸紅巾特攻隊按呢
ooh! kánn-ná bē-su âng-kin-ti̍k-kong-tuī án-ne
霧嗄嗄
bū-sà-sà
我反無一逝路通好夾菜
guá píng-bô tsi̍t-tsuā lōo thang-hó ngeh tshài
彼到尾仔反有乎
he kàu-bué-á píng ū–honnh
我的箸拄仔揬著碗底
guá ê tī tú-á tu̍h-tio̍h uánn-té
自按呢NO捽啦
tsua̋n nóo-sut–lah
欸欸!啊我講規晡久
eh-eh! ah guá kóng kui-poo kú
哪會無看著人
ná ē bô khuànn-tio̍h lâng
嘿!阿玉的啊
heh! A-gio̍k–ê ah
↑↑(口白)—(口白)—(口白)↑↑
離開你的身邊
lī-khui lí ê sin-pinn
毋是我願意
m̄-sī guá guān-ì
因為錯誤的愛情
in-uī tshò-gōo ê ài-tsîng
毋敢獻予你
m̄-kánn hiàn hōo lí
過去彼段的情意
kuè-khì hit tuānn ê tsîng-ì
親像一場夢
tshin-tshiūnn tsi̍t-tiûnn bāng
為啥物彼段因緣
uī-siánn-mih hit tuānn in-iân
會來拆分離
ē lâi thiah hun-lî
期待著春天花開
kî-thāi tio̍h tshun-thinn hue khui
會當佮你再相會
ē-tàng kah lí tsài sio-huē
