戇媽媽
《戇媽媽》Gōng Má-mah
龍千玉Liông Tshian-gio̍k
——————————————
芳的好的我先食
phang–ê hó–ê guá sing tsia̍h
懸落崎牽我行
peh-kuân lo̍h-kiā khan guá kiânn
若我發燒你上驚
nā guá huat-sio lí siōng kiann
若講袂聽你頭疼
nā kóng buē thiann lí thâu thiànn
蹛佇厝內上好命
tuà tī tshù-lāi siōng hó-miā
出外才知無人疼
tshut-guā tsiah tsai bô-lâng thiànn
有你處處路開闊
ū lí, tshù-tshù lōo khui-khuah
無你步步歹行踏
bô lí, pōo-pōo pháinn kiânn-ta̍h
戇媽媽飼阮大
gōng má-mah tshī gún tuā
一肩擔雙手拚
tsi̍t-king tann siang-tshiú piànn
粒粒汗換三頓飽
lia̍p-lia̍p kuānn uānn sann-tǹg pá
無為啥
bô uī siánn
較想嘛是囝
khah siūnn mā sī kiánn
越頭看你形影
ua̍t-thâu khuànn lí hîng-iánn
阿母啊你著勇健
a-bú–ah lí tio̍h ióng-kiānn
慢慢仔行
bān-bān-á kiânn
有我做伴
ū guá tsuē-phuānn
若會寒
nā ē kuânn
我的衫予你幔
guá ê sann hōo lí mua
