舊鐵橋
《舊鐵橋》Kū Thih-kiô
陳珍儀Tân Tin-gî
——————————————
大樹彼个舊鐵橋
Tuā-tshiū hit ê kū thih-kiô
公園開闊風景好
kong-hn̂g khui-khuah hong-kíng hó
大人囡仔來?迌
tuā-lâng gín-á lâi tshit-thô
拍球散步賴賴趖
phah-kiû sàn-pōo luā-luā sô
大樹彼个舊鐵橋
Tuā-tshiū hit ê kū thih-kiô
風颱水災無疼惜
hong-thai tsuí-tsai bô thiànn-sioh
青色草地已經無
tshinn-sik tsháu-tē í-king bô
花蕊佮樹木是全全倒
hue-luí tshiū-ba̍k sī tsuân-tsuân tó
舊鐵橋啊舊鐵橋
kū thih-kiô–ah kū thih-kiô
你上愛看著的
lí siōng ài khuànn–tio̍h-ê
是啊啥物款的景色
sī–ah siánn-mih khuán ê kíng-sik
你上愛聽著的
lí siōng ài thiann–tio̍h-ê
是啊啥物款的歌曲
sī–ah siánn-mih khuán ê kua-khik
你徛佇遐
lí khiā tī hia
敢有心事欲予咱臆
kám ū sim-sū beh hōo lán ioh
大樹彼个舊鐵橋
Tuā-tshiū hit ê kū thih-kiô
心愛故鄉的記號
sim-ài kòo-hiong ê kì-hō
看你來受傷啊
khuànn lí lâi siū-siong–ah
我心齊慒
guá sim tsiâu tso
為你來流汗
uī lí lâi lâu-kuānn
閣來向腰
koh lâi ànn-io
大樹彼个舊鐵橋
Tuā-tshiū hit ê kū thih-kiô
樹枝佮野草
tshiū-ki kah iá-tsháu
又閣隨風搖
iū-koh suî hong iô
鳥隻懷念
tsiáu-tsiah huâi-liām
世間寶
sè-kan pó
溫暖的燈火
un-luán ê ting-hué
又閣著
iū-koh to̍h
舊鐵橋啊舊鐵橋
kū thih-kiô–ah kū thih-kiô
伊上愛看著的
i siōng ài khuànn–tio̍h-ê
是啊湳田遐的景色
sī–ah làm-tshân hia ê kíng-sik
伊上愛聽著的
i siōng ài thiann–tio̍h-ê
是啊阿媽唱的歌曲
sī–ah a-má tshiùnn ê kua-khik
伊向望囡仔
i ǹg-bāng gín-á
攏知伊是舊鐵橋
lóng tsai i sī kū thih-kiô
