愛請你毋通走傷緊
《愛請你毋通走傷緊》Ài Tshiánn Lí M̄-thang Tsáu Siunn Kín
蕭玉芬Siau Gio̍k-hun
——————————————
愛
ài
請你毋通來傷緊
tshiánn lí m̄-thang lâi siunn kín
阮的心
gún ê sim
猶未做好準備
iáu-buē tsò-hó tsún-pī
阮希望你來的時陣
gún hi-bāng lí lâi ê sî-tsūn
阮是世間上媠的花蕊
gún sī sè-kan siōng suí ê hue-luí
愛
ài
請你毋通走傷緊
tshiánn lí m̄-thang tsáu siunn kín
阮的夢
gún ê bāng
猶未完全清醒
iáu-buē uân-tsuân tshing-tshínn
阮希望你走的時陣
gún hi-bāng lí tsáu ê sî-tsūn
會當看著你最後一面
ē-tàng khuànn-tio̍h lí tsuè-āu tsi̍t-bīn
為啥物你來去匆匆
uī-siánn-mih lí lâi-khì tshong-tshong
毋願留下你的行蹤
m̄-guān lâu-hā lí ê hîng-tsong
為啥物你來去如風
uī-siánn-mih lí lâi-khì jû hong
無法看清你的面容
bô-huat khuànn-tshing lí ê bīn-iông
一生的期待
it-sing ê kî-thāi
受盡風霜
siū-tsīn hong-song
一生的青春
it-sing ê tshing-tshun
為你埋葬
uī lí mâi-tsòng
