頭一擺寫情歌
《頭一擺寫情歌》Thâu Tsi̍t-pái Siá Tsîng-kua
米弦Bí-hiân
——————————————
你親像天頂的月娘
lí tshin-tshiūnn thinn-tíng ê gue̍h-niû
我毋是烏白亂講
guá m̄-sī oo-pe̍h luān-kóng
你的目睭
lí ê ba̍k-tsiu
敢若是暗暝的光
kánn-ná sī àm-mî ê kng
頭擺看著你
thâu-pái khuànn-tio̍h lí
我就偷偷仔流目屎
guá tiō thau-thau-á lâu ba̍k-sái
你敢知影
lí kám tsai-iánn
我的人生
guá ê jîn-sing
自彼工開始無仝
tsū hit-kang khai-sí bô-kāng
恬恬的陪伴
tiām-tiām ê puê-phuānn
厚操煩的我
kāu tshau-huân ê guá
我倒佇眠床
guá tó tī bîn-tshn̂g
總算無惡夢
tsóng-sǹg bô ok-bāng
夢著平安的生活
bāng-tio̍h pîng-an ê sing-ua̍h
活落來
ua̍h–lo̍h-lâi
是因為你
sī in-uī lí
你予我頭一擺寫情歌
lí hōo guá thâu tsi̍t-pái siá tsîng-kua
不再是悲傷重重疊疊
put-tsài sī pi-siong tîng-tîng-tha̍h-tha̍h
你是我夢中的愛人啊
lí sī guá bāng-tiong ê ài-jîn–ah
我會一世人
guá ē tsi̍t-sì-lâng
攏共你保庇
lóng kā lí pó-pì
保護你
pó-hōo lí
好好仔過每一工
hó-hó-á kuè muí tsi̍t-kang
