姻緣天註定
《姻緣天註定》In-iân Thinn Tsù-tiānn
麗娜Lē-ná
——————————————
阮爸母真無理解
gún pē-bú tsin bô lí-kái
毋知阮的心內
m̄-tsai gún ê sim-lāi
也無想阮的將來
iā bô siūnn gún ê tsiong-lâi
攏無替阮想看覓
lóng bô thè gún siūnn khuànn-māi
阮年紀已經遮濟
gún nî-kí í-king tsiah tsuē
應該著愛早安排
ing-kai tio̍h-ài tsá an-pâi
這款代誌講袂出來
tsit khuán tāi-tsì kóng buē tshut-lâi
憂悶在心內
iu-būn tsāi sim-lāi
彼一日遇著一个
hit-tsi̍t-ji̍t gū-tio̍h tsi̍t-ê
理想的翁婿
lí-sióng ê ang-sài
生做一表人才
sinn-tsuè it-piáu jîn-tsâi
對阮印象閣袂䆀
tuì gún ìn-siōng koh buē-bái
阮心內真正佮意
gún sim-lāi tsin-tsiànn kah-ì
一直等伊來求愛
it-ti̍t tán i lâi kiû-ài
誰知見面只有一擺
siáng tsai kìnn-bīn tsí-ū tsi̍t-pái
一去無回來
tsi̍t-khì bô huê-lâi
阮爸母替阮主意
gún pē-bú thè gún tsú-ì
嫁予一个大箍呆
kè hōo tsi̍t-ê tuā-khoo-tai
年紀比我大一倍
nî-kí pí guá tuā tsi̍t-puē
生做荏懶又無才
sinn-tsuè lám-nuā iū bô-tsâi
伊講阮真正可愛
i kóng gún tsin-tsiànn khó-ài
一日食飽踮厝內
tsi̍t-ji̍t tsia̍h-pá tiàm tshù-lāi
阮的運命哪會遮䆀
gún ê ūn-miā ná ē tsiah bái
敢是天安排
kám-sī thinn an-pâi
