轉踅
《轉踅》Tńg-se̍h
謝徐鳳玉Siā-Tshî Hōng-gio̍k
黃可樵N̂g Khó-tsiâu
——————————————
古早生活是真啊艱啊苦欸
kóo-tsá sing-ua̍h sī tsin–ah kan–ah khóo–eh
早早來出門按呢啊到下喔啊晡啊
tsá-tsá lâi tshut-mn̂g án-ní–ah kàu ē–ooh-ah poo–ah
有時中途是拄啊大雨欸
ū sî tiong-tôo sī tú–ah tuā-hōo–eh
沃到身啊軀欸按呢啊澹糊欸啊糊啊
ak kàu sin–ah khu–eh án-ní–ah tâm-kôo–eh-ah kôo–ah
–
一蕊花開佇咧夢中
tsi̍t-luí hue khui tī-leh bāng-tiong
閣墜落底
koh tuī lo̍h-té
這張批寄袂出
tsit tiunn phue kià buē-tshut
閣無地囥的心內話
koh bô-tè khǹg ê sim-lāi uē
你對山彼爿來
lí uì suann hit-pîng lâi
我對海這爿去啊
guá uì hái tsit-pîng khì–ah
彼當陣落的雨
hit-tang-tsūn lo̍h ê hōo
敢是今仔日
kám-sī kin-á-ji̍t
咱啉的水
lán lim ê tsuí
海岸是若有若無的線
hái-huānn sī ná-ū ná-bô ê suànn
淹著幾百年來的風沙
im tio̍h kuí-pah nî lâi ê hong-sua
青春是飄浪無聲的日誌紙
tshing-tshun sī phiau-lōng bô-siann ê ji̍t-tsì tsuá
無細膩落甲予人看無影
bô-sè-jī lo̍h kah hōo-lâng khuànn-bô iánn
袂赴脫殼的彼隻蝶仔
buē-hù thuat-khak ê hit tsiah ia̍h-á
佇落葉佮新芽當中
tī lo̍h-hio̍h kah sin-gê tang-tiong
戇戇仔等
gōng-gōng-á tán
向望著閣一擺
ǹg-bāng tio̍h koh tsi̍t-pái
振動飛起來啊
tín-tāng pue–khí-lâi–ah
飛過彼條
pue kuè hit tiâu
茫茫渺渺的地平線
bông-bông-biáu-biáu ê tē-pîng-suànn
無代無誌
bô-tāi-bô-tsì
嘛無影無跡
mā bô-iánn-bô-tsiah
無代無誌
bô-tāi-bô-tsì
嘛無影無跡
mā bô-iánn-bô-tsiah
無代無誌
bô-tāi-bô-tsì
嘛無影無跡
mā bô-iánn-bô-tsiah
無代無誌
bô-tāi-bô-tsì
嘛無影無跡
mā bô-iánn-bô-tsiah
月琴聲轉彎踅頭
gue̍h-khîm siann tńg-uan se̍h-thâu
牽我來想起
khan guá lâi siūnn-khí
阿媽的聲
a-má ê siann
山風若來
suann-hong nā lâi
我的聲愈闊
guá ê siann jú khuah
啊~唱一聲
ah~ tshiùnn tsi̍t-siann
古早的我
kóo-tsá ê guá
–
古早生活是真啊艱啊苦欸
kóo-tsá sing-ua̍h sī tsin–ah kan–ah khóo–eh
早早來出門按呢啊到下喔啊晡啊
tsá-tsá lâi tshut-mn̂g án-ní–ah kàu ē–ooh-ah poo–ah
有時中途是拄啊大雨
ū sî tiong-tôo sī tú–ah tuā-hōo
沃啊到身啊軀欸按呢啊澹糊欸啊糊啊
ak–ah kàu sin–ah khu–eh án-ní–ah tâm-kôo–eh-ah kôo–ah
耕田犁園是用人耕
king tshân lê hn̂g sī iōng lâng king
囡仔來出世著愛食母欸啊乳啊
gín-á lâi tshut-sì tio̍h-ài tsia̍h bó–eh-ah ling–ah
