奇珍
《奇珍》Kî-tin
林益菘Lîm I̍k-siong(黃藝N̂g Gē)
——————————————
夢著你的面
bāng-tio̍h lí ê bīn
阮毋甘清醒
gún m̄-kam tshing-tshínn
你慈祥的笑容
lí tsû-siông ê tshiò-iông
閣有檳榔粕的喙齒
koh ū pin-nn̂g-phoh ê tshuì-khí
彼爿敢有影媠
hit-pîng kám ū-iánn suí
總有一工
tsóng ū-tsi̍t-kang
我也會去
guá iā ē khì
保持咱的思念
pó-tshî lán ê su-liām
到時閣再見面
kàu-sî koh-tsài kìnn-bīn
啊咿啊~啊咿啊~啊咿啊~
ah-ih-ah~ ah-ih-ah~ ah-ih-ah~
到時閣再見面
kàu-sî koh-tsài kìnn-bīn
你敢有穿新衫
lí kám ū tshīng sin-sann
花色是扦閣奅
hue-sik sī tshuann koh phānn
若是有閣欠啥
nā-sī ū koh khiàm sánn
共我講
kā guá kóng
我寄予你啦
guá kià hōo lí–lah
婆娑的世界
pô-so ê sè-kài
敢真正足闊
kám tsin-tsiànn tsiok khuah
若是真正足闊
nā-sī tsin-tsiànn tsiok khuah
咱就寬寬仔行
lán tiō khuann-khuann-á kiânn
啊咿啊~啊咿啊~啊咿啊~
ah-ih-ah~ ah-ih-ah~ ah-ih-ah~
你就寬寬仔行
lí tiō khuann-khuann-á kiânn
聽講遐有七彩的光
thiann-kóng hia ū tshit-tshái ê kng
你著愛踏予穩
lí tio̍h-ài ta̍h hōo ún
毋通閣踮遐咧耍
m̄-thang koh tàm hia leh sńg
留寡仔夆相借問
lâu kuá-á hông sio-tsioh-mn̄g
昨暝是滿天星
tsa-mê sī muá-thinn tshinn
阮輕輕仔思念你
gún khin-khin-á su-liām lí
阮揣無嘛捎攏無
gún tshuē-bô mā sa lóng bô
佗一粒才是你
tó tsi̍t-lia̍p tsiah-sī lí
啊咿啊~啊咿啊~啊咿啊~
ah-ih-ah~ ah-ih-ah~ ah-ih-ah~
佗一粒才是你
tó tsi̍t-lia̍p tsiah-sī lí
阮唱歌予你聽
gún tshiùnn-kua hōo lí thiann
唱你少年愛的歌
tshiùnn lí siàu-liân ài ê kua
你敢有思念阮的聲
lí kám ū su-liām guán ê siann
若有
nā ū
就轉來看看咧
tiō tńg-lâi khuànn-khuànn–eh
阿母今仔有煮飯
a-bú kin-á ū tsú-pn̄g
有你愛的羊肉湯
ū lí ài ê iûnn-bah-thng
飯菜攏攢好勢矣
pn̄g-tshài lóng tshuân hó-sè–ah
你嘛好轉來啦
lí mā hó tńg-lâi–lah
啊咿啊~啊咿啊~啊咿啊~
ah-ih-ah~ ah-ih-ah~ ah-ih-ah~
你嘛好轉來啦
lí mā hó tńg-lâi–lah
你嘛好轉來啦
lí mā hó tńg-lâi–lah
你嘛好轉來啦
lí mā hó tńg-lâi–lah
