青春的彩筆
《青春的彩筆》Tshing-tshun ê Tshái-pit
蕭澤倫Siau Ti̍k-lûn
——————————————
攑一枝青春的彩筆
gia̍h tsi̍t-ki tshing-tshun ê tshái-pit
佮一本寫生簿
kah tsi̍t-pún siá-sing-phōo
揣一條清幽的小路
tshuē tsi̍t-tiâu tshing-iu ê sió-lōo
來畫圖
lâi uē-tôo
畫一陣風
uē tsi̍t-tsūn hong
畫一片葉落落塗
uē tsi̍t-phìnn hio̍h lak lo̍h-thôo
簡單的筆觸
kán-tan ê pit-tshiok
親像西北雨
tshin-tshiūnn sai-pak-hōo
喔~ ooh~
騎一隻生鉎的鐵馬
khiâ tsi̍t-tsiah senn-sian ê thih-bé
穿一軀破衫褲
tshīng tsi̍t-su phuà sann-khòo
揣一欉開花的蓮霧
tshuē tsi̍t-tsâng khui-hue ê lián-bū
來畫圖
lâi uē-tôo
畫一隻蝶仔
uē tsi̍t-tsiah ia̍h-á
畫伊佇咧跳舞的形影
uē i tī-leh thiàu-bú ê hîng-iánn
美麗的色彩
bí-lē ê sik-tshái
親像快樂的歌聲
tshin-tshiūnn khuài-lo̍k ê kua-siann
啊~ ah~
來畫圖
lâi uē-tôo
來畫圖來畫圖
lâi uē-tôo lâi uē-tôo
風吹佇阮的頭鬃
hong tshue tī gún ê thâu-tsang
嘛拍開心內的門窗
mā phah-khui sim-lāi ê mn̂g-thang
啊~來畫圖
ah~ lâi uē-tôo
來畫圖來畫圖
lâi uē-tôo lâi uē-tôo
畫小雨停
uē sió-hōo thîng
日頭照阮轉去的路
ji̍t-thâu tsiò gún tńg–khì ê lōo
