難忘的橋畔
《難忘的橋畔》Lân-bōng ê Kiô-puān
鄭琇月Tēnn Siù-gua̍t
——————————————
↓↓(口白)—(口白)—(口白)↓↓
– 外面是啥物人啊
guā-bīn sī siánn-mih lâng–ah
— 媽媽，是我啦
má-mah, sī guá–lah
– 無啊玉惠啊
bô–ah, Gio̍k-huī–ah
你又閣三更半暝
lí iū-koh sann-kinn-puànn-mî
才倒轉來
tsiah tò-tńg–lâi
是毋是又閣
sī-m̄-sī iū-koh
去佮彼个叫做啥物
khì kah hit-ê kiò-tsò siánn-mih
文雄仔的約會，是無?
Bûn-hiông–á ê iok-huē, sī–bô?
— 媽媽，我我
má-mah, guá, guá…
– 玉惠啊
Gio̍k-huī–ah
媽媽毋知影
má-mah m̄ tsai-iánn
欲共你講幾遍
beh kā lí kóng kuí-piàn
彼个文雄仔
hit-ê Bûn-hiông–á
是一个散赤囝
sī tsi̍t-ê sàn-tshiah-kiánn
又閣是一个做工仔人
iū-koh sī tsi̍t-ê tsuè-kang-á-lâng
如果你佮你鬥陣
jû-kó lí kah lí tàu-tīn
將來哪有啥物幸福咧
tsiong-lâi ná-ū sánn-mih hīng-hok–leh
— 媽媽，人彼个文雄仔
má-mah, lâng hit-ê Bûn-hiông–á
忠厚閣老實
tiong-hōo koh láu-si̍t
做工課又閣拍拚
tsuè khang-khuè iū-koh phah-piànn
將來一定會成功的
tsiong-lâi it-tīng ē sîng-kong–ê
– 玉惠啊，媽媽共你講
Gio̍k-huī–ah, má-mah kā lí kóng
是愛你好
sī ài lí hó
以後不准你閣佮伊來往
í-āu put-tsún lí koh kah i lâi-óng
好好聽媽媽的話，乎
hó-hó thiann má-mah ê uē, honnh
— 媽媽，阮無愛啦
má-mah, gún bô-ài–lah
阮無愛啦
gún bô-ài–lah
↑↑(口白)—(口白)—(口白)↑↑
夜半路燈光微微
iā-puànn lōo-ting kng bî-bî
佮伊相逢橋頭邊
kah i siong-hông kiô-thâu pinn
互相交往有情意
hōo-siong kau-óng ū tsîng-ì
希望會當結連理
hi-bāng ē-tàng kiat-liân-lí
因何母親無理解
in-hô bú-tshin bô lí-kái
嫌伊散赤無同意
hiâm i sàn-tshiah bô tông-ì
只有暫時來分開
tsí-ū tsiām-sî lâi hun-khui
等待分開見月圓
tán-thāi hun-khui kìnn gue̍h-înn
↓↓(口白)—(口白)—(口白)↓↓
— 玉惠，你昨暝
Gio̍k-huī, lí tsa-mê
閣受委屈矣，是無?
koh siū uí-khut–ah, sī–bô?
一切攏是我毋好
it-tshè lóng-sī guá m̄-hó
— 文雄兄，我我
Bûn-hiông-hiann, guá, guá…
— 你無講
lí bô kóng
我也了解
guá iā liáu-kái
恁媽媽嫌我
lín má-mah hiâm guá
是一个散赤囝
sī tsi̍t-ê sàn-tshiah-kiánn
無同意咱的來往
bô tông-ì lán ê lâi-óng
— 文雄兄
Bûn-hiông-hiann
一切攏是阮媽媽無理解
it-tshè lóng-sī gún má-mah bô lí-kái
請你原諒我，好無?
tshiánn lí guân-liōng guá, hó–bô?
— 我也知影
guá iā tsai-iánn
我是一个做工仔人
guá sī tsi̍t-ê tsò-kang-á-lâng
佮你無四配
kah lí bô sù-phuè
無法度帶予你
bô-huat-tōo tuà hōo lí
幸福佮快樂
hīng-hok kah khuài-lo̍k
咱只有
lán tsí-ū…
— 我無愛閣聽啦
guá bô-ài koh thiann–lah
這攏是命運的安排
tse lóng-sī miā-ūn ê an-pâi
文雄兄，請你毋通失志
Bûn-hiông-hiann, tshiánn lí m̄-thang sit-tsì
無論三年五冬
bô-lūn sann-nî gōo-tang
我的心
guá ê sim
永遠都屬於你
íng-uán to sio̍k-î lí
— 玉惠，真多謝你
Gio̍k-huī, tsin to-siā lí
我永遠會記得
guá íng-uán ē-kì-tit
咱甜蜜的過去
lán tinn-bi̍t ê kuè-khì
也多謝你予我
iā to-siā lí hōo guá
無限的鼓勵佮安慰
gô-hān ê kóo-lē kah an-uì
我會立志認真來拍拚
guá ē li̍p-tsì jīn-tsin lâi phah-piànn
請你等待我成功倒轉來
tshiánn lí tán-thāi guá sîng-kong tò-tńg–lâi
好無?
hó–bô?
— 好，文雄兄
hó, Bûn-hiông-hiann
我一定會等你轉來
guá it-tīng ē tán lí tńg–lâi
↑↑(口白)—(口白)—(口白)↑↑
秋風吹來心頭冷
tshiu-hong tshue–lâi sim-thâu líng
雙人分手橋頭邊
siang-lâng hun-tshiú kiô-thâu pinn
看著橋跤的流水
khuànn-tio̍h kiô-kha ê lâu-tsuí
像咱情絲斷袂離
tshiūnn lán tsîng-si tn̄g buē-lī
雖然命運來作弄
sui-jiân miā-ūn lâi tsok-lōng
望君著愛有志氣
bāng kun tio̍h-ài ū tsì-khì
無論三冬抑五年
bô-lūn sann-tang ia̍h gōo-nî
我會永遠等待你
guá ē íng-uán tán-thāi lí
