菝仔公園真可愛
《菝仔公園真可愛》Pa̍t-á Kong-hn̂g Tsin Khó-ài
蕭澤倫Siau Ti̍k-lûn
——————————————
永和市區的巷仔內
Íng-hô tshī-khu ê hāng-á-lāi
有一个所在真可愛
ū tsi̍t-ê sóo-tsāi tsin khó-ài
清風吹入阮心肝內
tshing-hong tshue ji̍p gún sim-kuann-lāi
來遮歇睏真自在
lâi tsia hioh-khùn tsin tsū-tsāi
永和市區的巷仔內
Íng-hô tshī-khu ê hāng-á lāi
有一个所在真厲害
ū tsi̍t-ê sóo-tsāi tsin lī-hāi
街頭巷尾攏足熟似
ke-thâu hāng-bué lóng tsiok si̍k-sāi
厝邊隔壁真心關懷
tshù-pinn-keh-piah tsin-sim kuan-huâi
雖然公園是無偌闊
sui-jiân kong-hn̂g sī bô guā khuah
阮有鳥仔來做伴
gún ū tsiáu-á lâi tsuè-phuānn
雖然不時有喇叭聲
sui-jiân put-sî ū lá-pah siann
阮嘛真快活
gún mā tsin khuìnn-ua̍h
遮是咱的菝仔公園
tsia sī lán ê pa̍t-á kong-hn̂g
創造幸福的門口埕
tshòng-tsō hīng-hok ê mn̂g-kháu-tiânn
遮是咱的菝仔公園
tsia sī lán ê pa̍t-á kong-hn̂g
大人囡仔攏惜命命
tuā-lâng gín-á lóng sioh-miā-miā
遮是咱的菝仔公園
tsia sī lán ê pa̍t-á kong-hn̂g
歡迎逐家攏來做伴
huan-gîng ta̍k-ke lóng lâi tsuè-phuānn
遮是咱的菝仔公園
tsia sī lán ê pa̍t-á kong-hn̂g
親情朋友攏真好命
tshin-tsiânn pîng-iú lóng tsin hó-miā
