咱來做銀河夢
《咱來做銀河夢》Lán Lâi Tsuè Gîn-hô Bāng
蕭澤倫Siau Ti̍k-lûn
——————————————
我做一个銀河夢
guá tsò tsi̍t-ê gîn-hô bāng
欲來對你講
beh lâi tuì lí káng
天邊的大水沖
thinn-pinn ê tuā tsuí-tshiâng
像媽媽的白頭鬃
tshiūnn má-mah ê pe̍h thâu-tsang
離開的彼一暗
lī-khui ê hit-tsi̍t-àm
新娘的目箍紅
sin-niû ê ba̍k-khoo âng
為著生活船出港
uī-tio̍h sing-ua̍h tsûn tshut-káng
欲來做都市人
beh lâi tsuè too-tshī-lâng
經過幾十冬
king-kuè kuí-tsa̍p tang
阿娘伊雙手放
a-niâ i siang-tshiú pàng
滿山花蕊失清芳
muá-suann hue-luí sit tshing-phang
人去樓也空
lâng khì lâu iā khang
規山全鐵銅
kui-suann tsuân thih-tâng
溪水攏汙染
khe-tsuí lóng u-jiám
夢中驚醒雙頭空
bāng-tiong kiann-tshínn siang-thâu khang
阮無愛做都市人
guán bô-ài tsuè too-tshī-lâng
簡簡單單一世人
kán-kán-tan-tan tsi̍t-sì-lâng
咱來做銀河夢
lán lâi tsuè gîn-hô bāng
襪仔寮溪邊
Bue̍h-á-liâu khe-pinn
咱鬥相共
lán tàu-sann-kāng
幸福好希望
hīng-hok hó hi-bāng
簡簡單單一世人
kán-kán-tan-tan tsi̍t-sì-lâng
咱來做銀河夢
lán lâi tsuè gîn-hô bāng
襪仔寮溪邊
Bue̍h-á-liâu khe-pinn
有花紅紅
ū hue âng-âng
感謝天鬥幫忙
kám-siā thinn tàu pang-bâng
我做一个銀河夢
guá tsò tsi̍t-ê gîn-hô bāng
欲來對你講
beh lâi tuì lí káng
滿山野花芳
muá-suann iá-hue phang
彩蝶做媒人
tshái-tia̍p tsuè muê-lâng
水雞啾啾叫
tsuí-ke tsiù-tsiù kiò
人客掣一趒
lâng-kheh tshuah tsi̍t-tiô
你我看破紅塵夢
lí guá khuànn-phuà âng-tîn bāng
甘願來做戇人
kam-guān lâi tsuè gōng-lâng
