伊只是想欲坐佇遐
《伊只是想欲坐佇遐》I Tsí-sī Siūnn-beh Tsē Tī Hia
蕭澤倫Siau Ti̍k-lûn
——————————————
你若遠遠看
lí nā hn̄g-hn̄g khuànn
會看著
ē khuànn-tio̍h
青青的一逝山
tshinn-tshinn ê tsi̍t-tsuā suann
山跤有一條
suann-kha ū tsi̍t-tiâu
烏烏的田圳岸
oo-oo ê tshân-tsùn huānn
坐一个笑笑的老阿媽
tsē tsi̍t-ê tshiò-tshiò ê lāu a-má
怹翁離開早
in ang lī-khui tsá
怹後生嘛做粗工
in hāu-sinn mā tsuè tshoo-kang
做甲斷性命
tsuè kah tn̄g sìnn-miā
伊的新婦真僥雄
i ê sin-pū tsin hiau-hiông
是放下兩个囝
sī pàng-hā nn̄g-ê kiánn
伊著一爿做田
i tio̍h tsi̍t-pîng tsuè-tshân
一爿來共怹
tsi̍t-pîng lâi kā in
寬寬仔晟
khuann-khuann-á tshiânn
有一工
ū-tsi̍t-kang
怹坐佇樹頭
in tsē tī tshiū-thâu
抐涼兼洗跤
lā-liâng kiam sé-kha
遠遠有一台烏頭仔
hn̄g-hn̄g ū tsi̍t-tâi oo-thâu-á
駛入來門口埕
sái ji̍p-lâi mn̂g-kháu-tiânn
怹講地方發展
in kóng tē-hng huat-tián
國家未來
kok-ka bī-lâi
需要恁來徙
su-iàu lín lâi suá
恁這塊爛田
lín tsit tè nuā-tshân
趁袂赴食
thàn bē-hù tsia̍h
阮用金山來佮你換
gún ōng kim-suann lâi kah lí uānn
阿媽毋捌字
a-má m̄ bat-jī
但是嘛無影遮軟汫
tān-sī mā bô-iánn tsiah nńg-tsiánn
掃帚攑咧
sàu-tshiú gia̍h–leh
就戽怹出大廳
tō hòo in tshut tuā-thiann
一日田做煞
tsi̍t-ji̍t tshân tsuè suah
是雷公兼爍爁
sī luî-kong kiam sih-nah
一陣警察仔
tsi̍t-tīn kíng-tshat-á
共怪手來護駕
kā kuài-tshiú lâi hōo-kà
攑放送頭咧喝聲
gia̍h hòng-sàng-thâu teh huah-siann
準備欲來拆
tsún-pī beh lâi thiah
伊只是想欲坐佇遐
i tsí-sī siūnn-beh tsē tī hia
你著駛?塗機
lí tio̍h sái khat-thôo-ki
來共伊請
lâi kā-i tshiánn
請伊莫閣看
tshiánn i mài koh khuànn
莫閣哭甲大細聲
mài koh khàu kah tuā-sè-siann
請伊目睭瞌瞌
tshiánn i ba̍k-tsiu kheh-kheh
離開彼鎮位的公媽廳
lī-khui he tìn-uī ê kong-má-thiann
伊只是想欲坐佇遐
i tsí-sī siūnn-beh tsē tī hia
只是想欲予乖孫的
tsí-sī siūnn-beh hōo kuai-sun–ê
有飯通好食
ū pn̄g thang-hó tsia̍h
想欲予祖先仔
siūnn-beh hōo tsóo-sian-á
有人奉祀
ū-lâng hōng-sāi
有閒轉來看
ū-îng tńg-lâi khuànn
只是想欲
tsí-sī siūnn-beh
參伊的愛人仔
tsham i ê ài-jîn-á
有一工會當埋做伴
ū-tsi̍t-kang ē-tàng tâi tsuè-phuānn
