爸爸爸爸
《爸爸爸爸》Pá-pah Pá-pah
潘麗鈞Phuann Lē-kun
——————————————
予阮最思慕的人
hōo gún tsuè su-bōo ê lâng
最敬愛的人
tsuè kìng-ài ê lâng
你的慈愛疼痛教示
lí ê tsû-ài thiànn-thàng kà-sī
已經永遠離開著阮
í-king íng-uán lī-khui tio̍h gún
永遠離開阮
íng-uán lī-khui gún
也無見著最後一面
iā bô kìnn-tio̍h tsuè-āu tsi̍t-bīn
永別的爸爸
íng-pia̍t ê pá-pah
天國的爸爸
thian-kok ê pá-pah
你大概是真寂寞
lí tāi-khài sī tsin tsi̍k-bo̍k
真悲傷瞑目來過身
tsin pi-siong mî-ba̍k lâi kuè-sin
爸囝的情份
pē-kiánn ê tsîng-hūn
求你赦免不孝的女兒
kiû lí sià-bián put-hàu ê lú-jî
阮每日懷念的人
gún muí-ji̍t huâi-liām ê lâng
在夢中的人
tsāi bāng-tiong ê lâng
日落西海
ji̍t lo̍h se-hái
月在東山
ge̍h tsāi tong-san
就來想起溫柔笑容
tsiū lâi siūnn-khí un-jiû tshiò-iông
慈悲的目睭
tsû-pi ê ba̍k-tsiu
引阮心酸喉滇叫著
ín gún sim sng âu tīnn kiò tio̍h
心內的爸爸
sim-lāi ê pá-pah
親愛的爸爸
tshin-ài ê pá-pah
為怎樣恬恬看阮
uī-tsuánn-iūnn tiām-tiām khuànn gún
為怎樣在遠遠叫阮
uī-tsuánn-iūnn tsāi hn̄g-hn̄g kiò gún
夢中來見阮
bāng-tiong lâi kìnn gún
敢毋是來看護著女兒
kám m̄-sī lâi khàn-hōo tio̍h lú-jî
無受著享受的人
bô siū-tio̍h hiáng-siū ê lâng
無福氣的人
bô hok-khì ê lâng
為細囝將來的幸福
uī sè-kiánn tsiong-lâi ê hīng-hok
春夏秋冬
tshun-hā tshiu-tong
連日連夜
liân-ji̍t liân-iā
勤儉來拍拚
khîn-khiām lâi phah-piànn
無管積勞
bô-kuán tsik-lô
無惜性命
bô-sioh sìnn-miā
病亡的爸爸
pēnn-bông ê pá-pah
㾀命的爸爸
khiap-miā ê pá-pah
你大概是真寂寞
lí tāi-khài sī tsin tsi̍k-bo̍k
在天堂無聊過日子
tsāi thian-tng bô-liâu kè ji̍t-tsí
請永遠安息
tshiánn íng-uán an-sik
永遠安息
íng-uán an-sik
快樂過日子
khuài-lo̍k kè ji̍t-tsí
