風中飛翔
《風中飛翔》Khong-tiong Hui-siông
臺北室內合唱團Tâi-pak Sik-lāi Ha̍p-tshiùnn-thuân
——————————————
若講著咱的夢
nā kóng-tio̍h lán ê bāng
兩个人
nn̄g-ê lâng
定定會日時講到暗
tiānn-tiānn ē ji̍t–sî kóng kàu àm
有希望嘛有不安
ū hi-bāng mā ū put-an
行向未來的每一工
kiânn hiòng bī-lâi ê muí tsi̍t-kang
遙遠的咱的夢
iâu-uán ê lán ê bāng
兩个人
nn̄g-ê lâng
手牽手欲達成願望
tshiú khan-tshiú beh ta̍t-sîng guān-bāng
有歡喜嘛有困難
ū huann-hí mā ū khùn-lân
等待成功的彼一工
tán-thāi sîng-kong ê hit-tsi̍t-kang
若風城季風起
nā hong-siânn kuì-hong khí
咱就欲飛出去
lán tiō beh pue–tshut-khì
大海的後面
tuā-hái ê āu-bīn
全世界
tsuân sè-kài
夢想的舞臺
bāng-sióng ê bú-tâi
一束白線
tsi̍t-sok pe̍h-suànn
開始編織的夢
khai-sí pian-tsit ê bāng
無夠用的材料
bô-kàu īng ê tsâi-liāu
是時間
sī sî-kan
一張白紙
tsi̍t-tiunn pe̍h-tsuá
開始畫的希望
khai-sí uē ê hi-bāng
水彩是隨隨湠開的年冬
tsuí-tshái sī suî-suî thuànn-khai ê nî-tang
水彩是隨隨湠開的年冬
tsuí-tshái sī suî-suî thuànn-khai ê nî-tang
咱佇風中飛翔
lán tī hong-tiong pue-siông
咱佇夢中飛翔
lán tī bāng-tiong pue-siông
飛愈懸愈接近
pue jú kuân jú tsiap-kīn
溫暖的太陽
un-luán ê thài-iông
咱佇風中飛翔
lán tī hong-tiong pue-siông
咱佇夢中飛翔
lán tī bāng-tiong pue-siông
飛過大地飛過海洋
pue kuè tāi-tē pue kuè hái-iông
飛過大地飛過海洋
pue kuè tāi-tē pue kuè hái-iông
永遠會記著
íng-uán ē kì-tio̍h
故鄉的方向
kòo-hiong ê hong-hiòng
故鄉的方向
kòo-hiong ê hong-hiòng
永遠會記著
íng-uán ē kì-tio̍h
故鄉的方向
kòo-hiong ê hong-hiòng
