月光色的頭鬃
《月光色的頭鬃》Gue̍h-kng Sik ê Thâu-tsang
臺北室內合唱團Tâi-pak Sik-lāi Ha̍p-tshiùnn-thuân
——————————————
回憶之海的海岸
huê-ik tsi hái ê hái-huānn
閣看著你的背影
koh khuànn-tio̍h lí ê puē-iánn
輕輕仔佇夜風中飄動
khin-khin-á tī iā-hong tiong phiau-tāng
月光色的頭鬃
gue̍h-kng sik ê thâu-tsang
回憶之海的海浪
huê-ik tsi hái ê hái-lōng
不時咧心頭使弄
put-sî teh sim-thâu sái-lōng
漸漸離開
tsiām-tsiām lī-khui
像水退的夢
tshiūnn tsuí thè ê bāng
月光色的頭鬃
gue̍h-kng sik ê thâu-tsang
回憶之夢的跤步
huê-ik tsi bāng ê kha-pōo
閣行佇我的心路
koh kiânn tī guá ê sim-lōo
一步一步
tsi̍t-pōo tsi̍t-pōo
一幕一幕
tsi̍t-bōo tsi̍t-bōo
瞬時的快樂
sùn-sî ê khuài-lo̍k
永遠的苦楚
íng-uán ê khóo-tshóo
回憶之海的海風
huê-ik tsi hái ê hái-hong
無袂記咱的約束
bô buē-kì lán ê iok-sok
替你傳送
thè lí thuân-sàng
懷念的清芳
huâi-liām ê tshing-phang
月光色的頭鬃
gue̍h-kng sik ê thâu-tsang
飄動
phiau-tāng
飄動
phiau-tāng
月光色的頭鬃
gue̍h-kng sik ê thâu-tsang
佇夜風中飄動
tī iā-hong tiong phiau-tāng
