毋通為錢賭性命
《毋通為錢賭性命》M̄-thang Uī Tsînn Tóo Sìnn-miā
黃克林N̂g Khik-lîm
——————————————
是好額是散赤
sī hó-gia̍h sī sàn-tshiah
一切是運命
it-tshè sī ūn-miā
有錢人講話
ū-tsînn-lâng kóng-uē
生成較大聲
sinn-sîng khah tuā-siann
無錢人安份守己
bô-tsînn-lâng an-hūn-siú-kí
人袂驚
lâng buē kiann
風水好歹輪流行
hong-suí hó-pháinn lûn-liû kiânn
無人三代攏好額
bô-lâng sann-tāi lóng hó-gia̍h
無人三代攏散赤
bô-lâng sann-tāi lóng sàn-tshiah
叫一聲放蕩囝
kiò tsi̍t-siann hòng-tōng-kiánn
做人著愛
tsuè-lâng tio̍h-ài
留予人探聽
lâu hōo-lâng thàm-thiann
叫一聲散赤囝
kiò tsi̍t-siann sàn-tshiah-kiánn
做事著愛
tsuè-sū tio̍h-ài
認真拍拚
jīn-tsin phah-piànn
歹路毋通行
pháinn-lōo m̄-thang kiânn
毋通毋通
m̄-thang m̄-thang
毋通為錢賭性命
m̄-thang uī tsînn tóo sìnn-miā
毋通為錢賭性命
m̄-thang uī tsînn tóo sìnn-miā
