前面後面的前面
《前面後面的前面》Tsîng-bīn Āu-bīn ê Tsîng-bīn
唐銘良Tn̂g Bîng-liông
——————————————
禮數著囥佇前面
lé-sòo tio̍h khǹg tī tsîng-bīn
拳頭小藏佇後面
kûn-thâu sió tshàng tī āu-bīn
先禮後兵
sing lé hiō ping
你就威風八面
lí tiō ui-hong pat-bīn
規矩愛佇桌面
kui-kí ài tshāi tī toh-bīn
赤跤著曲佇下面
tshiah-kha tio̍h khiau tī ē-bīn
會做表面
ē tsò piáu-bīn
人袂笑你毋捌世面
lâng buē tshiò lí m̄-bat sè-bīn
?打扮閣裝門面
gâu tánn-pān koh tsng mn̂g-bīn
愛風神又閣闊手面
ài hong-sîn iū-koh khuah tshiú-bīn
牛鬼蛇神
gû-kuí siâ-sîn
嘛愛予你三分薄面
mā ài hōo lí sann-hun po̍k-bīn
新來的愛探聽勢面
sin lâi–ê ài thàm-thiann sè-bīn
拜碼頭毋通冷面
pài bé-thâu m̄-thang líng-bīn
崁頭崁面
khàm-thâu khàm-bīn
小等咧
sió-tán–eh
予人舂甲戇面
hōo-lâng tsing kah gōng-bīn
嘿!少年的
heh! siàu-liân–ê
你是咧走跳佗一方面
lí sī teh tsáu-thiàu tó tsi̍t hong-bīn
風透
hong thàu
著愛閃鋒面
tio̍h-ài siám hong-bīn
好運
hó-ūn
愛會記得網開一面啊
ài ē-kì-tit bāng khui tsi̍t-bīn–ah
我講少年的
guá kóng siàu-liân–ê
你是捌偌濟牛頭馬面
lí sī bat guā-tsuē gû-thâu bé-bīn
拍狗愛看主人面
phah káu ài khuànn tsú lâng-bīn
毋通囂俳
m̄-thang hiau-pai
自以為媠面
tsū í-uî suí-bīn
就算提著鐵支牌面
tiō-sǹg the̍h-tio̍h thih-ki pâi-bīn
嘛愛看一下仔
mā ài khuànn tsi̍t-ē-á
前面後面
tsîng-bīn āu-bīn
