相思人
《相思人》Siunn-si Lâng
尤莉Iû-lī
——————————————
袂食袂睏
buē-tsia̍h buē-khùn
多情的人
to-tsîng ê lâng
相思過頭定定夢
siunn-si kuè-thâu tiānn-tiānn bāng
夢見心愛的入阮房
bāng-kìnn sim-ài–ê ji̍p gún pâng
雙手抱阮毋甘放
siang-tshiú phō gún m̄-kam pàng
啊~多情夢
ah~ to-tsîng bāng
醒來無半項
tshínn–lâi bô-puànn-hāng
予我想著真怨嘆
hōo guá siūnn-tio̍h tsin uàn-thàn
好夢本是一場空
hó-bāng pún sī tsi̍t-tiûnn khang
明明聽見拍門聲
bîng-bîng thiann-kìnn phah-mn̂g siann
夢中醒來著搭嚇
bāng-tiong tshínn–lâi tio̍h tah-hiannh
敢是阮的貼心兄
kám-sī gún ê tah-sim hiann
開門共看才知影
khui-mn̂g kā khuànn tsiah tsai-iánn
啊~貼心兄
ah~ tah-sim hiann
鳥仔咧叫聲
tsiáu-á teh kiò siann
每日為君費心情
muí-ji̍t uī kun huì sim-tsiânn
秋風騙阮空空行
tshiu-hong phiàn gún khang-khang kiânn
月娘照在檳榔欉
gue̍h-niû tsiò tsāi pin-nn̂g-tsâng
樹影搖動射入窗
tshiū-iánn iô-tāng siā ji̍p-thang
親像心愛的彼个人
tshin-tshiūnn sim-ài ê hit ê lâng
佮阮做陣睏仝房
kah gún tsuè-tīn khùn kāng pâng
啊~想規暗
ah~ siūnn kui-àm
為君咧苦嘆
uī kun teh khóo-thàn
為著阿君每日等
uī-tio̍h a-kun muí-ji̍t tán
等無阿君仔你一人
tán-bô a-kun–á lí tsi̍t-lâng
