爸爸的西裝社
《爸爸的西裝社》Pá-pah ê Se-tsong-siā
安苡葳An Í-ui(大芭)
——————————————
爸爸的西裝社
pá-pah ê se-tsong-siā
踮佇小小的庄跤
tiàm tī sió-sió ê tsng-kha
伊的規模無偌大
i ê kui-bôo bô guā tuā
伊的辛苦阮知影
i ê sin-khóo gún tsai-iánn
爸爸的西裝社
pá-pah ê se-tsong-siā
逐工有人來做衫
ta̍k-kang ū-lâng lâi tsuè-sann
伊的笑容掛喙角
i ê tshiò-iông kuà tshuì-kak
一爿裁衫
tsi̍t-pîng tshâi-sann
一爿唸歌
tsi̍t-pîng liām-kua
揹著伊的英尺帶
phāinn tio̍h i ê ìn-tsih-tuà
聽著伊的鉸布聲
thiann-tio̍h i ê ka-pòo siann
予阮無憂的生活
hōo gún bô-iu ê sing-ua̍h
予阮袂來受風寒
hōo gún buē lâi siū hong-kuânn
揹著伊的英尺帶
phāinn tio̍h i ê ìn-tsih-tuà
聽著伊的鉸布聲
thiann-tio̍h i ê ka-pòo siann
是阮熟似的形影
sī gún si̍k-sāi ê hîng-iánn
是阮溫暖的港岸
sī gún un-luán ê káng-huānn
