啉酒的借口
《啉酒的借口》Lim-tsiú ê Tsioh-kháu
呂秋霓Lī Tshiu-gê
——————————————
昨暝阮翁去啉燒酒
tsa-mî gún ang khì lim sio-tsiú
這是為怎樣
tse sī uī-tsuánn-iūnn
因為我無佮伊
in-uī guá bô kah i
手牽手
tshiú khan-tshiú
手牽手
tshiú khan-tshiú
今仔日阮翁
kin-á-ji̍t gún ang
閣去啉燒酒
koh khì lim sio-tsiú
這又閣是按怎樣
tse iū-koh sī án-tsuánn-iūnn
因為我無佮伊
in-uī guá bô kah i
鬥陣去遊賞
tàu-tīn khì iû-siúnn
啉酒借口
lim-tsiú tsioh-kháu
講甲遮滑溜
kóng kah tsiah ku̍t-liu
就是揣無莫啉的理由
tiō-sī tshuē-bô mài lim ê lí-iû
一直蹧躂阮的溫柔
it-ti̍t tsau-that gún ê un-jiû
瞞東拐西攏毋成樣
muâ-tang kuái-sai lóng m̄-tsiânn-iūnn
毋通予阮
m̄-thang hōo gún
閣再沐沐泅
koh-tsài bo̍k-bo̍k-siû
定定心肝嘛結規毬
tiānn-tiānn sim-kuann mā kiat-kui-kiû
勸恁著愛會曉想
khǹg lín tio̍h-ài ē-hiáu siūnn
家庭美滿才有成就
ka-tîng bí-buán tsiah ū sîng-tsiū
