水面月影
《水面月影》Tsuí-bīn Gue̍h-iánn
臺北室內合唱團Tâi-pak Sik-lāi Ha̍p-tshiùnn-thuân
——————————————
浮佇水面的月影
phû tī tsuí-bīn ê gue̍h-iánn
閃閃爍爍
siám-siám-sih-sih
引我心疼
ín guá sim thiànn
分開彼暝的月娘
hun-khui hit-mî ê gue̍h-niû
照入去你的目睭
tsiò ji̍p-khì lí ê ba̍k-tsiu
閃閃爍爍
siám-siám-sih-sih
遐爾溫柔
hiah-nī un-jiû
細膩共水面月影
sè-jī kā tsuí-bīn gue̍h-iánn
輕輕捀起來手頂
khin-khin phâng khí-lâi tshiú-tíng
閣按怎撈
koh án-tsuánn hôo
嘛干焦會當
mā kan-na ē-tàng
撈著透心冷
hôo tio̍h thàu-sim líng
就親像
tiō tshin-tshiūnn
咱兩人相會時
lán nn̄g-lâng siong-huē sî
發出來的愛情
huat–tshut-lâi ê ài-tsîng
遐爾真誠
hiah-nī tsin-sîng
嘛無奈
mā bô-nāi
袂當攬你佇胸前
buē-tàng lám lí tī hing-tsîng
浮佇水面的月影
phû tī tsuí-bīn ê gue̍h-iánn
迷迷濛濛
bê-bê-bông-bông
漸看袂清
tsiām khuànn buē-tshing
星群失光明
tshinn-kûn sit kong-bîng
月娘覕入去閘天的雲
gue̍h-niû bih ji̍p-khì tsa̍h thinn ê hûn
水面月影無地尋
tsuí-bīn gue̍h-iánn bô-tè sîm
