新編問卜歌
《新編問卜歌》Sin-pian Mn̄g-pok Kua
古意唸歌團Kóo-ì Liām-kua Thuân
——————————————
手攑籤筒有咧三支喔
tshiú gia̍h tshiam-tâng ū–leh sann-ki–ooh
欲卜新娘入門喜
beh pok sin-niô ji̍p-mn̂g-hí
現在有身啊三月日啊
hiān-tsāi ū-sin–ah sann gue̍h-gi̍t–ah
哎喲喂
ai-iō-uê
包領會生啊
pau-niá ē senn–ah
莫延遲啊
bo̍k iân-tî–ah
莫延遲
bo̍k iân-tî
籤欸
tshiam–eh
籤聖卦定
tshiam sìng kuà tiānn
卜卦是欲來算命
pok-kuà sī beh lâi sǹg-miā
啊要命冊
ah iàu miā-tsheh
來斷命格
lâi tuān miā-keh
好歹事我是知pheh-pheh
hó-pháinn sū guá sī tsai pheh-pheh
後生來卜老爸啊
hāu-senn lâi pok lāu-pē–ah
小嬸仔卜大伯
sió-tsím-á pok tuā-peh
啊怹新婦欲卜
ah in sin-pū beh pok
是怹大家
sī in ta-ke
外甥仔卜母舅啊
guē-sing-á pok bó-kū–ah
舅仔來卜姊夫啊
kū-á lâi pok tsí-hu–ah
怹大官欲卜
in ta-kuann beh pok
是怹新婦
sī in sin-pū
猶閣再卜
iá koh-tsài pok
逐項有
ta̍k-hāng ū
老大人
lāu-tuā-lâng
卜予你食百二
pok hōo lí tsia̍h-pah-jī
少年的
siàu-liân–ê
卜予你大趁錢
pok hōo lí tuā thàn-tsînn
若囡仔人
nā gín-á-lâng
卜予你好育飼啊
pok hōo lí hó-io-tshī–ah
欸~恁有翁的查某人
eh~ lín ū ang ê tsa-bóo-lâng
嫁翁若袂合和
kè-ang nā bē ha̍p-hô
彼卜予你會合和
he pok hōo lí ē ha̍p-hô
恁翁暗時仔
lín ang àm-sî-á
?你去玲瑯邏喔
tshuā lí khì lin-long lô–ooh
四界好?迌
sì-kè hó tshit-thô
啊若有彼翁愛開的喔
ah nā ū he ang ài-khai–ê ooh
來卜
lâi pok
我就知
guá tō tsai
哎喲!這个先生是遐厲害啊
ai-iō! tsit ê sian-sinn sī hiah lī-hāi–ah
講翁若愛開
kóng ang nā ài-khai
伊卜就知啊欸
i pok tiō tsai–ah-eh
若無
nā-bô
我來共伊卜看覓
guá lâi kā-i pok khuànn-māi
來看先生
lâi khuànn sian-sinn
伊知毋知哩咿~
i tsai m̄-tsai–lih ih~
謼!恁看這
hooh! lín khuànn tse
這个查某
tsit ê tsa-bóo
孝呆的啦
hàu-tai–ê lah
伊講按呢謼!
i kóng án-ne, hooh!
我免卜嘛知
guá bián pok mā tsai
汰會毋知咧
thài-ē m̄-tsai–leh
啊先生啊
ah sian-sinn–ah
嘿嘿嘿, 按怎?
hennh hennh hennh, án-ná?
欲啥代?查某官
beh siánn tāi? tsa-bóo-kuann
哎喲!我共你講啦
ai-iō! guá kā lí kóng–lah
阮翁乎暗時
gún ang–honnh àm-sî
攏無踮咧厝啦
lóng bô tiàm teh tshù–lah
放阮一个人
pàng gún tsi̍t-ê-lâng
守空岫
tsiú khang-siū
哎喲!可憐
ai-iō! khó-liân
我身邊來無丈夫
guá sin-pinn lâi bô tiōng-hu
你這款的
lí tsit-khuán–ê
我知
guá tsai
我看你的面就知
guá khuànn lí ê bīn tō tsai
恁翁定著誠愛開喔
lín ang tiānn-tio̍h tsiânn ài-khai–ooh
謼!無啦!
hooh! bô–lah!
遐有彼个閒工去開啦
hiah ū hit ê îng-kang khì khai–lah
伊乎…
i–honnh…
伊是乎
i sī–honnh
啊啊啊, 是按怎?你毋著講
ah-ah-ah, sī-án-ná? lí m̄-to̍h kóng
伊乎, 伊蹛博物館啦
i–honnh, i tuà phok-bu̍t-kuán–lah
謼!蹛博物館?!
hooh! tuà phok-bu̍t-kuán?!
啊蹛這博物館囉
ah tuà tse phok-bu̍t-kuán–loh
是真可憐啊哩
sī tsin khó-liân–ah-lih
逐工身軀啊
ta̍k-kang sin-khu–ah
是軟連連啊欸
sī nńg liân-liân–ah-eh
身軀痠疼是人厭?
sin-khu sng-thiànn sī lâng ià-siān
不時加班啊
put-sî ka-pan–ah
加甲頭衝煙啊欸
ka kah thâu tshìng-ian–ah-eh
這途有影是可憐代喔
tsit tôo ū-iánn sī khó-liân-tāi–ooh
聽伊咧講啊我才知啊欸
thiann i leh kóng–ah guá tsiah tsai–ah-eh
人講入館是深似海
lâng kóng ji̍p kuán sī tshim sū hái
難得脫身走出來咿~
lân-tit thuat-sin tsáu–tshut-lâi ih~
哎喲!先生你講了著啦
ai-iō! sian-sinn lí kóng liáu tio̍h–lah
入這館乎
ji̍p tsit kuán–honnh
袂輸魚著鉤鳥入網
bē-su hî tio̍h-kau tsiáu ji̍p-bāng
較慘雞仔蹛雞櫳喔
khah-tshám ke-á tuà ke-lang–ooh
哎喲!先生啊
ai-iō! sian-sinn–ah
你著可憐我這个
lí tio̍h khó-liân guá tsit ê
守活寡的婦人人
tsiú ua̍h-kuá ê hū-jîn-lâng
小姐小姐你免煩惱
sió-tsiá sió-tsiá lí bián huân-ló
將時就是欲來
tsiòng-sî tō-sī beh lâi
卜你的干支啊
pok lí ê kan-tsi–ah
來!你佇佗位咧徛起
lâi! lí tī tó-uī teh khiā-khí
姓啥物名啥物
sènn siánn-mih miâ siánn-mih
你著共我來講起
lí to̍h kā guá lâi kóng-khí
我通好來
guá thang-hó lâi
共你斷卦米
kā lí tuān kuà-bí
啊恁翁蹛佇咧佗一塊
ah lín ang tuà tī-eh tó tsi̍t-tè
你今年是有幾歲啊
lí kin-nî sī ū kuí-huè ah
哎喲!先生啊
ai-iō! sian-sinn–ah
阮是徛家咧五塊寮
gún sī khiā-ke teh Gōo-tè-liâu
阮翁相馬來我相猴
gún ang siùnn-bé lâi guá siùnn-kâu
伊是三十一
i sī sann-tsa̍p-it
人我二十九
lâng guá jī-tsa̍p-káu
嫁伊做某
kè i tsò bóo
我是誠癮頭
guá sī tsiânn giàn-thâu
哎喲!先生啊喂
ai-iō! sian-sinn–ah-uê
人講嫁雞
lâng kóng kè ke
著愛啄米
to̍h-ài tok bí
啊若嫁狗
ah nā kè káu
著生狗螕喔
to̍h senn káu-pi–ooh
可憐我
khó-liân guá
嫁這箍若空氣
kè tsit khoo ná khong-khì
蹛這个博物館
tuà tsit ê phok-bu̍t-kuán
是不了時
sī put-liáu-sî
我敢是欠這齒的
guá kám-sī khiàm tsit-khí–ê
死人債
sí-lâng-tsè
無想講伊是夫
bô siūnn-kóng i sī hu
啊我是妻
ah guá sī tshe
煞不時予我
suah put-sî hōo guá
咧睏孤个
leh khùn koo-ê
有時我尻脊骿
ū-sî guá kha-tsiah-phiann
叫無人通好扒
kiò-bô lâng thang-hó pê
阮囝的手捗
gún kiánn ê tshiú-pôo
閣是細仔个
koh sī sè-á-ê
扒了閣袂煞癢
pê liáu koh buē suah tsiūnn
我扒閣癢
guá pê koh tsiūnn
哎喲!癢閣扒
ai-iō! tsiūnn koh pê
扒閣癢閣癢閣扒
pê koh tsiūnn koh tsiūnn koh pê
可憐我嫁翁
khó-liân guá kè-ang
欲傍翁勢
beh pn̄g ang sè
無疑煞來夯翁枷
bô-gî suah lâi giâ ang kê
早知影我嘛莫嫁人
tsá tsai-iánn guá mā mài kè–lâng
踮厝是較好勢喔
tiàm tshù sī khah hó-sè–ooh
唉!較贏咧做這毋成翁某
haih! khah iânn leh tsò tse m̄-tsiânn ang-bóo
來全問題
lâi tsuân būn-tê
謼!啊你欲問按呢喔?
hooh! ah lí beh mn̄g án-ne–ooh?
嘿啦
hennh lah
好! 來啊!
hó! lâi–ah!
籤筒一搖動
tshiam-tâng tsi̍t iô-tāng
六十甲子排五冬
la̍k-tsa̍p kah-tsí pâi gōo-tang
伏羲神農孔子周公
Ho̍k-hi Sîn-lông Khóng-tsú Tsiu-kong
五大聖賢
ngóo tāi sìng-hiân
求先天外卦
kiû sian-thian guā-kuà
來主人的造化
lâi tsú-lâng ê tsō-huà
來!抽一支啊
lâi! thiu ti̍t-ki–ah
喔!好!
ooh! hó!
啊!帶壽帶福
ah! tài siū tài hok
有福來論卦
ū hok lâi lūn-kuà
閣再抽一支啊
koh-tsài thiu tsi̍t-ki–ah
喔!閣一支
ooh! koh tsi̍t-ki
謼!來
hooh! lâi
今,查某官
tann, tsa-bóo-kuann
嘿!
hennh!
我照卦來共你斷乎
guá tsiàu kuà lâi kā lí tuān–honnh
嘿嘿嘿
hennh hennh hennh!
欸,這通講毋通講, 唅?
eh, tse thang kóng m̄-thang kóng, hannh?
哎啊!先生啊
aih-ah! sian-sinn–ah
做你講啊
tsò lí kóng–ah
欸,啊卜好你免歡喜
eh, ah pok hó lí bián huann-hí
卜歹莫受氣喔
pok pháinn mài siūnn-khì–ooh
哎喲!好啦好啦好啦
ai-iō! hó–lah hó–lah hó–lah
先生你緊講啦
sian-sinn lí kín kóng–lah
好!來啊
hó! lâi–ah
你抽著這支囉
lí thiu tio̍h tsit ki–loh
就是山風蠱
tō-sī san-hong-kóo
欲問翁某啊
beh mn̄g ang-bóo–ah
做你免煩惱啊欸
tsò lí bián huân-ló–ah-eh
這是官鬼持世的啊運途
tse sī kuann-kuí tshî-sè ê–ah ūn-tôo
兩人定著啊
nn̄g-lâng tiānn-tio̍h–ah
會合和啊欸
ē ha̍p-hô–ah-eh
人講歷史文化
lâng kóng li̍k-sú bûn-huà
就是好寶
tō-sī hó-pó
伊是咧拍拚的
i sī teh phah-piànn–ê
毋是愛風騷啊欸
m̄-sī ài hong-so–ah-eh
古早的根基
kóo-tsá ê kin-ki
著留予好
to̍h lâu hōo hó
咱的囝孫
lán ê kiánn-sun
才通是有倚靠
tsiah thang sī ū uá-khò
你聽我的喙囉
lí thiann guá ê tshuì–loh
袂有錯
bē ū tshò
啊若有錯咧
ah nā ū tshò–leh
有錯嘛
ū tshò–mah
你就拖我這个卜卦先
lí tō thua guá tsit ê pok-kuà-sian
來摃?迌
lâi kòng tshit-thô
咿~ ih~
新編問卜歌
sin-pian mn̄g-pok kua
多謝逐家
to-siā ta̍k-ke
