思念
《思念》Su-liām
玟靈Bûn-lîng
——————————————
思念親像是
su-liām tshin-tshiūnn sī
一場甜蜜的夢
tsi̍t-tiûnn tinn-bi̍t ê bāng
伴我度過寂寞的夜
phuānn guá tōo-kuè tsi̍k-bo̍k ê iā
來想你
lâi siūnn lí
思念著咱
su-liām tio̍h lán
捌做伙計畫的未來
bat tsuè-hué kè-uē ê bī-lâi
一个幸福的將來
tsi̍t-ê hīng-hok ê tsiong-lâi
思念親像是
su-liām tshin-tshiūnn sī
一張空虛的網
tsi̍t-tiunn khang-hi ê bāng
束縛著我無奈的心
sok-pa̍k tio̍h guá bô-nāi ê sim
受折磨
siū tsiat-buâ
思念著咱
su-liām tio̍h lán
毋甘放愛恨的靈魂
m̄-kam pàng ài-hūn ê lîng-hûn
一个酸澀的青春
tsi̍t-ê sng-siap ê tshing-tshun
雙人感情
siang-lâng kám-tsîng
若是行到這時陣
nā-sī kiânn kàu tsit sî-tsūn
才知一切攏是緣份
tsiah tsai it-tshè lóng-sī iân-hūn
袂當傷心
buē-tàng siong-sim
來行入輪迴的門
lâi kiânn-ji̍p lûn-huê ê mn̂g
彼是痛苦的恨
he sī thòng-khóo ê hūn
月娘閣來陪伴我
gue̍h-niû koh lâi puê-phuānn guá
行到天光
kiânn kàu thinn kng
透早的日頭
thàu-tsá ê ji̍t-thâu
親像咧笑我的命運
tshin-tshiūnn teh tshiò guá ê miā-ūn
