流星的願望
《流星的願望》Liû-tshinn ê Guān-bāng
陳祈信Tân Kî-sìn
——————————————
對流星下一个願
tuì liû-tshinn hē tsi̍t-ê guān
我愛的人攏平安
guá ài ê lâng lóng pîng-an
一粒心貯著千百項
tsi̍t-lia̍p sim té tio̍h tshian-pah hāng
總是為愛毋甘放
tsóng-sī uī ài m̄-kam pàng
付出所有心甘情願
hù-tshut sóo-ū sim kam tsîng guān
人攏有未完成的夢
lâng lóng ū bī uân-sîng ê bāng
各人的夢無相仝
kok-lâng ê bāng bô sio-kāng
為著前途
uī-tio̍h tsiân-tôo
幸福佮希望
hīng-hok kah hi-bāng
逐工透早拚到暗
ta̍k-kang thàu-tsá piànn kah àm
嘛是為著所愛的人
mā sī uī-tio̍h sóo ài ê lâng
多情的城市
to-tsîng ê siânn-tshī
有愛有美夢
ū ài ū bí-bāng
佇大街佮小巷
tī tuā-ke kah sió-hāng
滿滿蹛著有情人
muá-muá tuà tio̍h ū-tsîng lâng
每一个樓窗
muí tsi̍t-ê lâu-thang
點著每一个希望
tiám tio̍h muí tsi̍t-ê hi-bāng
愛從來毋捌
ài tsiông-lâi m̄-bat
辜負真心人
koo-hū tsin-sim lâng
放袂落的心
pàng buē-lo̍h ê sim
有我的向望
ū guá ê ǹg-bāng
佮阮愛的人
kah gún ài ê lâng
一直幸福到永遠
it-ti̍t hīng-hok kàu íng-uán
心內的願望
sim-lāi ê guān-bāng
對著流星來傳送
tuì tio̍h liû-tshinn lâi thuân-sàng
期待會當
kî-thāi ē-tàng
實現我的夢
si̍t-hiān guá ê bāng
