阿娘
《阿娘》A-niâ
唐儷Tn̂g Lē
——————————————
人生總有一工
jîn-sing tsóng ū tsi̍t-kang
我會老
guá ē lāu
無力喝你教你
bô-la̍t huah lí kà lí
面對是非的紛擾
bīn-tuì sī-hui ê hun-jiáu
人生總有一工你會吼
jîn-sing tsóng ū tsi̍t-kang lí ē háu
已經看無揣無
í-king khuànn-bô tshuē-bô
我踮你耳邊叨擾
guá tiàm lí hīnn-pinn tho-jiáu
我將兩字教示
guá tsiong nn̄g-jī kà-sī
寫佇冰冷的藤條
siá tī ping-líng ê tîn-tiâu
一聲一聲
tsi̍t-siann-tsi̍t-siann
攏是疼入阿娘的心頭
lóng-sī thiànn ji̍p a-niâ ê sim-thâu
驚你受寒驚你枵
kiann lí siū kuânn kiann lí iau
一領破衫
tsi̍t-niá phuà-sann
毋甘擲掉
m̄-kam tàn-tiāu
驚你跋倒驚你哭
kiann lí pua̍h-tó kiann lí khàu
一粒心傱甲勞透透
tsi̍t-lia̍p sim tsông kah lô thàu-thàu
聽你一聲叫媽媽
thiann lí tsi̍t-siann kiò má-mah
你欲輕輕梳我白髮
lí beh khin-khin se guá pe̍h-huat
風颳樹頭嘆已老
hong kuat tshiū-thâu thàn í lāu
養而不教
ióng jî put kàu
一生了了
it-sing liáu-liáu
一塊明玉若無雕
tsi̍t-tè bîng-gio̍k nā bô tiau
毋知天懸抑地厚
m̄-tsai thinn kuân ia̍h tē kāu
我的心肝
guá ê sim-kuann
以後你就看會曉
í-āu lí tiō khuànn ē-hiáu
