戀戀紅毛港
《戀戀紅毛港》Luân-luân Âng-mn̂g-káng
洪文斌Âng Bûn-pin
——————————————
聽著紅毛港這个名
thiann-tio̍h Âng-mn̂g-káng tsit ê miâ
心就陣陣仔疼
sim tiō tsūn-tsūn-á thiànn
曾經是咱的性命
tsan-king sī lán ê sìnn-miā
如今煞看無影
jû-kim suah khuànn-bô iánn
種種的過去
tsióng-tsióng ê kuè-khì
無奈的心情
bô-nāi ê sim-tsiânn
予我心酸哭無聲
hōo guá sim sng khàu-bô siann
紅毛港啊紅毛港
Âng-mn̂g-káng–ah Âng-mn̂g-káng
是你予阮的姓
sī lí hōo gún ê sìnn
是你予阮的名
sī lí hōo gún ê miâ
是你共阮生
sī lí kā gún sinn
共阮晟
kā gún tshiânn
祖先愛有靈聖
tsóo-sian ài ū lîng-siànn
望囝孫愛拍拚
bāng kiánn-sun ài phah-piànn
咱的土地
lán ê thóo-tē
愛留路予咱行
ài lâu lōo hōo lán kiânn
紅毛港啊紅毛港
Âng-mn̂g-káng–ah Âng-mn̂g-káng
紅毛港
Âng-mn̂g-káng
是咱最難忘的名
sī lán tsuè lân-bōng ê miâ
