男人的擔當
《男人的擔當》Lâm-jîn ê Tam-tng
吳俊宏Ngôo Tsùn-hông
——————————————
手捀著往事
tshiú phâng tio̍h óng-sū
我攑頭問月娘
guá gia̍h-thâu mn̄g gue̍h-niû
啉完這喙
lim uân tsit tshuì
情淚沉封的苦酒
tsîng-luī tîm-hong ê khóo-tsiú
何時才有心的歸處
hô-sî tsiah ū-sim ê kui-tshù
我像孤鳥飛離岫
guá tshiūnn koo-tsiáu pue lî-siū
才知情落佇你身軀
tsiah tsai tsîng lak tī lí sin-khu
今夜的月
kim-iā ê gue̍h
照一身飄浪的靈魂
tsiò tsi̍t-sin phiau-lōng ê lîng-hûn
看人生
khuànn jîn-sing
我無身份
guá bô sin-hūn
你對我百依百順
lí tuì guá pah-i-pah-sūn
我吞淚配三頓飯
guá thun luī phuè sann-tǹg pn̄g
你的手
lí ê tshiú
向我懷中伸
hiòng guá huâi-tiong tshun
從來毋捌有怨恨
tsiông-lâi m̄-bat ū uàn-hūn
我欲擔起你的愁
guá beh tann khí lí ê tshiû
拭掉你的淚紛紛
tshit tiāu lí ê luī hun-hun
我毋願放你孤單睏
guá m̄-guān pàng lí koo-tuann khùn
我欲予你看見
guá beh hōo lí khuànn-kìnn
一个男人的擔當
tsi̍t-ê lâm-jîn ê tam-tng
