快樂的港邊
《快樂的港邊》Khuài-lo̍k ê Káng-pinn
白櫻Pe̍h-ing(施豐櫻Si Hong-ing)
——————————————
心愛的彼个情伴
sim-ài ê hit ê tsîng-phuānn
想起來
siūnn–khí-lâi
佮伊分離
kah i hun-lî
已經是一年
í-king sī tsi̍t-nî
踮港都彼間舞廳
tiàm káng-too hit king bú-thiann
雙人見面情綿綿
siang-lâng kìnn-bīn tsîng mî-mî
做陣來糖蜜甜
tsuè-tīn lâi thn̂g-bi̍t-tinn
遊賞港邊的景緻
iû-siúnn káng-pinn ê kíng-tì
雖然是已經離開
sui-jiân sī í-king lī-khui
雖然是已經離開
sui-jiân sī í-king lī-khui
猶原來暝日思念
iû-guân lâi mî-ji̍t sir-liām
思念著彼當時
sir-liām tio̍h hit-tang-sî
快樂的港邊
khuài-lo̍k ê káng-pinn
心愛的彼个情伴
sim-ài ê hit ê tsîng-phuānn
彼一暝看見海面
hit tsi̍t-mî khuànn-kìnn hái-bīn
火船燈閃爍
hé-tsûn ting siám-sih
若親像對咱祝福
ná-tshin-tshiūnn tuì lán tsiok-hok
將來一定會順序
tsiong-lâi it-tīng ē sūn-sī
做陣來合唱著
tsuè-tīn lâi ha̍p-tshiùnn tio̍h
一條慕情的歌詩
tsi̍t-tiâu bōo-tsîng ê kua-si
茫茫來留在心內
bông-bông lâi lâu tsāi sim-lāi
茫茫來留在心內
bông-bông lâi lâu tsāi sim-lāi
引起阮暝日思念
ín-khí gún mî-ji̍t sir-liām
思念著彼當時
sir-liām tio̍h hit-tang-sî
快樂的港邊
khuài-lo̍k ê káng-pinn
心愛的彼个情伴
sim-ài ê hit ê tsîng-phuānn
日黃昏海鳥飛來
ji̍t hông-hun hái-tsiáu pe–lâi
歇在船頭墘
hioh tsāi tsûn-thâu kînn
陪伴阮送伊出帆
puê-phuānn gún sàng i tshut-phâng
踮在港岸心綿綿
tiàm-tsāi káng huānn sim mî-mî
做陣來約束著
tsuè-tīn lâi iok-sok tio̍h
雙人再會的日期
siang-lâng tsài-huē ê ji̍t-kî
伊現在怎咧過日
i hiān-tsāi tsuánn teh kè-ji̍t
伊現在怎咧過日
i hiān-tsāi tsuánn teh kè-ji̍t
心稀微暝日思念
sim hi-bî mî-ji̍t sir-liām
思念著彼當時
sir-liām tio̍h hit-tong-sî
快樂的港邊
khuài-lo̍k ê káng-pinn
