舊裘仔
《舊裘仔》Kū Hiû-á
陳隨意Tân Suî-ì
——————————————
穿佇身軀
tshīng tī sin-khu
彼一領舊裘仔
hit tsi̍t-niá kū hiû-á
規个冬天
kui-ê tang-thinn
嘛攏毋捌換
mā lóng m̄-pat uānn
敢是阿母
kám-sī a-bú
留予阮的身影
lâu hōo gún ê sin-iánn
無一領會當
bô tsi̍t-niá ē-tàng
比伊較燒熱
pí i khah sio-jua̍h
猶原是
iu-guân sī
彼一領舊裘仔
hit tsi̍t-niá kū hiû-á
親像阿母
tshin-tshiūnn a-bú
抱阮佇心肝
phō gún tī sim-kuann
受盡風霜
siū-tsīn hong-song
異鄉孤鳥心情
ī-hiong koo-tsiáu sim-tsiânn
無一暝會當
bô tsi̍t-mî ē-tàng
消除這款孤單
siau-tû tsit khuán koo-tuann
若是一滴目屎
nā-sī tsi̍t-tih ba̍k-sái
愛配一滴汗
ài phuè tsi̍t-tih kuānn
較苦的將來
khah khóo ê tsiong-lâi
嘛著擔
mā tio̍h tann
就算一路無平
tiō-sǹg tsi̍t-lōo bô pînn
愛用一生拚
ài iōng it-sing piànn
想厝的戇囝
siūnn tshù ê gōng-kiánn
無一工驚
bô tsi̍t-kang kiann
