寫一字愛
《寫一字愛》Siá Tsi̍t-jī Ài
王茉聿Ông Bua̍t-u̍t
——————————————
踮佇這个冷暖世界
tiàm-tī tsit ê líng-luán sè-kài
總是心內充滿感慨
tsóng-sī sim-lāi tshiong-buán kám-khài
有人委屈恬恬忍耐
ū-lâng uí-khut tiām-tiām jím-nāi
有人等待命運安排
ū-lâng tán-thāi miā-ūn an-pâi
想起過去迷人風采
siūnn-khí kuè-khì bê-lâng hong-tshái
鏡中的你敢有熟似
kiànn-tiong ê lí kám ū si̍k-sāi
有時偷偷流著目屎
ū sî thau-thau lâu tio̍h ba̍k-sái
有時踮烏暗內
ū sî tiàm oo-àm lāi
行袂出來
kiânn buē tshut-lâi
人生春天欲來
jîn-sing tshun-thinn beh lâi
風雨無情
hong-hōo bô-tsîng
路上徘徊
lōo-siōng pâi-huê
你開始懷疑
lí khai-sí huâi-gî
家己敢有未來
ka-kī kám ū bī-lâi
徛佇烏暗斷崖
khiā tī oo-àm tuān-gâi
心是無奈
sim sī bô-nāi
孤單的大海
koo-tuann ê tuā-hái
我用真心寫一字愛
guá iōng tsin-sim siá tsi̍t-jī ài
一字一字充滿關懷
tsi̍t-jī-tsi̍t-jī tshiong-buán kuan-huâi
想欲予你避雨的所在
siūnn-beh hōo lí pī-hōo ê sóo-tsāi
暫時遠離所有的悲哀
tsiām-sî uán-lî sóo-ū ê pi-ai
我用祝福
guá iōng tsiok-hok
寫一字愛
siá tsi̍t-jī ài
希望你解脫
hi-bāng lí kái-thuat
自由自在
tsū-iû tsū-tsāi
毋驚未來有偌濟阻礙
m̄-kiann bī-lâi ū guā-tsē tsóo-gāi
我會陪你
guá ē puê lí
揣夢中的世界
tshuē bāng-tiong ê sè-kài
—
寫一字愛
siá tsi̍t-jī ài
寫一字愛
siá tsi̍t-jī ài
寫一字愛
siá tsi̍t-jī ài
