礁溪礁溪唚一下
《礁溪礁溪唚一下》Ta-khe Ta-khe Tsim–tsi̍t-ē
吳瑞峰Ngôo Suī-hong
——————————————
來去礁溪洗溫泉
lâi-khì Ta-khe sé un-tsuânn
遊山玩水好心情
iû-san uán-suí hó sim-tsiânn
佮你約會
kah lí iok-huē
咱約佇遮
lán iok tī tsia
甜言蜜語講袂煞
tinn-giân bi̍t-gí kóng bē-suah
來去礁溪洗溫泉
lâi-khì Ta-khe sé un-tsuânn
靠山倚海美麗城
khò-suann uá-hái bí-lē siânn
做伙騎著跤踏車
tsuè-hué khiâ tio̍h kha-ta̍h-tshia
沿路踅來夜市仔
iân-lōo se̍h lâi iā-tshī-á
礁溪礁溪唚一下
Ta-khe Ta-khe tsim–tsi̍t-ē
有咱山盟佮海誓
ū lán san-bîng kah hái-sè
天頂閃爍的流星
thinn-tíng siám-sih ê liû-tshinn
叫咱放輕鬆來
kiò lán pàng khin-sang–lâi
免歹勢
bián pháinn-sè
礁溪礁溪唚一下
Ta-khe Ta-khe tsim–tsi̍t-ē
心愛的
sim-ài–ê
當時才欲嫁
tang-sî tsiah beh kè
溫泉水溫暖咱的心
un tsuânn-tsuí un-luán lán ê sim
今夜月色
kim-iā ge̍h-sik
親像你
tshin-tshiūnn lí
遮爾美麗
tsiah-nī bí-lē
來去礁溪洗溫泉
lâi-khì Ta-khe sé un-tsuânn
青山綠水來做伴
tshing-san li̍k-suí lâi tsuè-phuānn
來五峰旗聽水聲
lâi Ngóo-hong-kî thiann tsuí-siann
自由自在真快活
tsū-iû tsū-tsāi tsín khuìnn-ua̍h
來去礁溪洗溫泉
lâi-khì Ta-khe sé un-tsuânn
鬧熱的街仔踅袂煞
lāu-jia̍t ê ke-á se̍h buē-suah
包仔魚羹佮蔥油餅
pau-á hî-kinn kah tshang-iû-piánn
在地的美食食免驚
tsāi-tē ê bí-si̍t tsia̍h bián-kiann
