風颱天
《風颱天》Hong-thai-thinn
等阮返來(等阮轉來樂團Tán GuánTńg–lâi Ga̍k-thuân)
——————————————
想你的時陣
siūnn lí ê sî-tsūn
親像是搪著風颱天
tshin-tshiūnn sī tn̄g-tio̍h hong-thai-thinn
窗外咧落雨
thang-guā teh lo̍h-hōo
窗內無你佇我身邊
thang-lāi bô lí tī guá sin-pinn
無你的日子
bô lí ê ji̍t-tsí
思念像雨水
su-liām tshiūnn hōo-tsuí
掰袂離
pué buē-lī
你的形影
lí ê hîng-iánn
親像一陣風
tshin-tshiūnn tsi̍t-tsūn hong
吹過去
tshue–kuè-khì
戇戇等等等
gōng-gōng tán tán tán
等無心愛的你越頭看
tán bô sim-ài–ê lí ua̍t-thâu khuànn
世事煩煩煩
sè-sū huân huân huân
生活親像
sing-ua̍h tshin-tshiūnn
半暝咧做風颱
puànn-mê leh tsuè-hong-thai
時間慢慢慢
sî-kan bān bān bān
一工無看著你
tsi̍t-kang bô khuànn-tio̍h lí
就白頭鬃
tiō pe̍h thâu-tsang
心情亂亂亂
sim-tsîng luān luān luān
愛袂著你
ài bē-tio̍h lí
這世人攏抾捔
tsit-sì-lâng lóng khioh-ka̍k
—
你的笑容
lí ê tshiò-iông
親像紅色胭脂
tshin-tshiūnn âng-sik ian-tsi
抹佇我的心內面
buah tī guá ê sim-lāi-bīn
看無頭前的路
khuànn-bô thâu-tsîng ê lōo
嘛無要緊
mā bô-iàu-kín
因為我身邊有你
in-uī guá sin-pinn ū lí
