初次的約會
《初次的約會》Tshoo-tshù ê Iok-huē
張素綾Tiunn Sòo-lîng
——————————————
也無來講著半句
iā bô lâi kóng-tio̍h puànn-kù
甘蜜的情話
kam-bi̍t ê tsîng-uē
也毋敢看阮的面
iā m̄-kánn khuànn gún ê bīn
頭殼閣犁犁
thâu-khak koh lê-lê
害著阮心肝頭
hāi-tio̍h gún sim-kuann-thâu
tin-tiang-tiang
想欲來對伊開喙
siūnn-bueh lâi tuì i khui-tshuì
看著伊的面
khuànn-tio̍h i ê bīn
想袂到伊的面啊
siūnn buē-kàu i ê bīn–ah
佮阮真倚近
kah gún tsin uá-kīn
害著阮心肝頭
hāi-tio̍h gún sim-kuann-thâu
tin-tiang-tiang
伊一時感覺見笑
i tsi̍t-sî kám-kak kiàn-siàu
趕緊行離開
kuánn-kín kiânn lī-khui
伊又閣毋知怎樣
i iū-koh m̄-tsai tsuánn-iūnn
吐著大心氣
thóo tio̍h tuā-sim-khuì
害著阮心肝頭
hāi-tio̍h gún sim-kuann-thâu
tin-tiang-tiang
阮顛倒感覺歹勢
gún tian-tò kám-kak pháinn-sè
走去伊身邊
tsáu-khì i sin-pinn
阮毋知伊會越頭
gún m̄-tsai i ē ua̍t-thâu
對阮笑咪咪
tuì gún tshiò bi-bi
害著阮心肝頭
hāi-tio̍h gún sim-kuann-thâu
tin-tiang-tiang
頭一句伊來開喙
thâu tsi̍t-kù i lâi khui-tshuì
叫著阮名字
kiò tio̍h gún miâ-jī
頭一次聽伊聲音
thâu tsi̍t-tshù thiann i siann-im
帶著熱情味
tài tio̍h jia̍t-tsîng bī
害著阮心肝頭
hāi-tio̍h gún sim-kuann-thâu
tin-tiang-tiang
無應伊半句的話
bô ìn i puànn-kù ê uē
對阮笑一下
tuì gún tshiò–tsi̍t-ē
無疑伊對阮喙䫌
bô-gî i tuì gún tshuì-phé
輕輕唚一下
khin-khin tsim–tsi̍t-ē
害著阮心肝頭
hāi-tio̍h gún sim-kuann-thâu
tin-tiang-tiang
害著阮心肝頭
hāi-tio̍h gún sim-kuann-thâu
tin-tiang-tiang
害著阮心肝頭
hāi-tio̍h gún sim-kuann-thâu
tin-tiang-tiang
