半睏半醒半眠夢
《半睏半醒半眠夢》Puànn-khùn Puànn-tshínn Puànn Bîn-bāng
林俊彥Lîm Tsùn-gān
——————————————
初更等到五更
tshoo-kinn tán-kàu gōo-kinn
攑頭看對面天
gia̍h-thâu khuànn tuì-bīn thinn
看袂著你彼粒星
khuànn buē-tio̍h lí hit lia̍p tshinn
只有開喙來問天
tsí-ū khui-tshuì lâi mn̄g thinn
天對我嘛講毋知
thinn tuì guá mā kóng m̄-tsai
原來你無佇天邊
guân-lâi lí bô tī thinn-pinn
你猶原睏佇阮身邊
lí iu-guân khùn tī gún sin-pinn
是我美夢夢袂醒
sī guá bí-bāng bāng buē tshínn
半睏半醒
puànn-khùn puànn-tshínn
又半眠夢
iū puànn bîn-bāng
夢中只有你一人
bāng-tiong tsí-ū lí tsi̍t-lâng
因為你是我一生的夢
in-uī lí sī guá it-sing ê bāng
我毋捌夢過別人
guá m̄-bat bāng kuè pa̍t-lâng
從今以後
tsiông-kim í-āu
你是我的心愛的人
lí sī guá ê sim-ài ê lâng
從今以後
tsiông-kim í-āu
我是你的有情人
guá sī lí ê ū-tsîng lâng
半睏半醒
puànn-khùn puànn-tshínn
半眠夢
puànn bîn-bāng
希望兩人做仝夢
hi-bāng nn̄g-lâng tsuè kāng bāng
