天公伯的查某囝
《天公伯的查某囝》Thinn-kong-peh ê Tsa-bóo-kiánn
林宏銘Lîm Hông-bîng
——————————————
雨早慢會停
hōo tsá-bān ē thîng
天總是會光
thinn tsóng–sī ē kng
雖然人生過程
sui-jiân jîn-sing kuè-tîng
有風有湧
ū hong ū íng
猶有我徛佇你這爿
iáu ū guá khiā tī lí tsit pîng
毋通怨嘆
m̄-thang uàn-thàn
天生這款命
thian-sing tsit khuán miā
毋通當做
m̄-thang tòng-tsuè
一切是註定
it-tshè sī tsù-tiānn
雖然艱苦
sui-jiân kan-khóo
路是家己行
lōo sī ka-kī kiânn
這條路
tsit tiâu lōo
你並袂孤單
lí pīng buē koo-tuann
你是天公伯的查某囝
lí sī thinn-kong-peh ê tsa-bóo-kiánn
只是花開的時
tsí-sī hue khui ê sî
唱著哀怨的歌
tshiùnn tio̍h ai-uàn ê kua
你是天公伯的查某囝
lí sī thinn-kong-peh ê tsa-bóo-kiánn
傷心無助的時陣
siong-sim bû-tsōo ê sî-tsūn
我有聽著你的聲
guá ū thiann-tio̍h lí ê siann
