採茶歌
《採茶歌》Tshái-tê Kua
白櫻Pe̍h-ing(施豐櫻Si Hong-ing)
——————————————
茶山風啊光喔
tê-suann hong–ah kong–ooh
真明媚唷
tsin bîng-bī–iooh
阿娘歌聲鬥人意
a-niû kua-siann tàu-lâng-ì
滿山青啊翠喔
muá-suann tshinn–ah tshuì–ooh
茶葉芳唷
tê-hio̍h phang–iooh
阿娘挽茶心輕鬆唷
a-niû bán-tê sim khin-sang–iooh
春天茶啊葉
tshun-thinn tê–ah hio̍h
當到水唷
tng kàu-tsuí–iooh
阿娘青春心當開
a-niû tshing-tshun sim tng khui
溫暖春啊風
un-luán tshun–ah hong
弄茶葉唷
lāng tê-hio̍h–iooh
阿娘手搖心也搖
a-niû tshiú iô sim iā iô
茶葉毋啊驚喔
tê-hio̍h m̄–ah kiann–ooh
風抑雨唷
hong ia̍h hōo–iooh
阿娘工作無耽誤
a-niû kang-tsok bô tam-ngōo
透早挽啊茶喔
thàu-tsá bán–ah tê–ooh
到黃昏唷
kàu hông-hun–iooh
阿娘快樂笑呅呅唷
a-niû khuài-lo̍k tshiò-bûn-bûn–iooh
