黃昏的歌詩
《黃昏的歌詩》Hông-hun ê Kua-si
簡雅子Kán Ngá-tsú
——————————————
白翎鷥雙雙對對
pe̍h-līng-si siang-siang tuì-tuì
踮田岸墘唸歌詩
tiàm tshân-huānn-kînn liām kua-si
圳溝的水
tsùn-kau ê tsuí
也真清氣
iā tsin tshing-khì
大肚魚泅來泅去
tuā-tōo-hî siû-lâi-siû-khì
水豆油鬧熱嗤嗤
tsuí-tāu-iû lāu-jia̍t tshi-tshi
粟鳥仔掩掩揜揜
tshik-tsiáu-á ng-ng-iap-iap
佮稻草人走相覕
kah tiū-tsháu-lâng tsáu-sio-bih
黃昏的天
hông-hun ê thinn
五彩色水
ngóo-tshái sik-tsuí
田嬰也飛來飛去
tshân-inn iā pue-lâi-pue-khì
蠓仔欲藏去佗位
báng-á beh tshàng khì tó-uī
火金蛄點燈線
hué-kim-koo tiám ting-suànn
蟋蟀仔溫柔唱歌
sih-sut-á un-jiû tshiùnn-kua
暗暝的茄苳樹跤
àm-mî ê ka-tang-tshiū kha
恬恬聽水雞講古早
tiām-tiām thiann tsuí-ke kóng kóo-tsá
恬恬看月娘
tiām-tiām khuànn ge̍h-niû
樹林
peh tshiū-nâ
咱逐家歡歡喜喜
lán ta̍k-ke huann-huann-hí-hí
洗盪換衫動碗箸
sé-tn̄g uānn sann tāng uánn-tī
粒粒汗水
lia̍p-lia̍p kuānn-tsuí
滿喙清甜
muá-tshuì tshing-tinn
啉一杯回甘滋味
lim tsi̍t-pue huê-kam tsu-bī
黃昏的歌詩上媠
hông-hun ê kua-si siōng suí
