他鄉的明信片
《他鄉的明信片》Thann-hiong ê Bîng-sìn-phìnn
羅文聰Lô Bûn-tshong
——————————————
慢慢拍開我的行李
bān-bān phah-khui guá ê hîng-lí
輕輕思念你
khin-khin su-liām lí
雖然日時
sui-jiân ji̍t–sî
踮在天邊海角
tiàm-tsāi thinn-pinn hái-kak
過暗暝
kuè àm-mî
手提一張
tshiú the̍h tsi̍t-tiunn
風景的明信片
hong-kíng ê bîng-sìn-phìnn
想欲寄予你
siūnn-beh kià hōo lí
關於他鄉
kuan-î thann-hiong
多變的趣味
to-piàn ê tshù-bī
猶有當初
iáu-ū tong-tshoo
對愛的堅持
tuì ài ê kian-tshî
清風吹來花的芳味
tshing-hong tshue lâi hue ê phang-bī
田嬰蝴蝶飛身邊
tshân-enn ôo-tia̍p pue sin-pinn
看見水雞
khuànn-kìnn tsuí-ke
跳來又跳去
thiàu-lâi iū thiàu-khì
心情真清氣
sim-tsîng tsin tshing-khì
黃昏的天色
hông-hun ê thinn-sik
若親像一齣一齣戲
ná-tshin-tshiūnn tsi̍t-tshut-tsi̍t-tshut hì
毋甘放袂記
m̄-kam pàng-buē-kì
只要真情溫暖咱的心
tsí-iàu tsin-tsîng un-luán lán ê sim
感動伴阮來過日子
kám-tōng phuānn gún lâi kuè ji̍t-tsí
海邊的景緻
hái-pinn ê kíng-tì
也親像一齣一齣戲
iā tshin-tshiūnn tsi̍t-tshut-tsi̍t-tshut hì
難分又難離
lân-hun iū lân-lî
這段分開的日子
tsit tuānn hun-khui ê ji̍t-tsí
若對阮猶原會想起
nā tuì gún iu-guân ē siūnn-khí
我會緊轉去
guá ē kín tńg–khì
