舊衫
《舊衫》Kū-sann
阿吉仔A-kiat–á
——————————————
雖然已經無出色
sui-jiân í-king bô tshut-sik
型體早就退時行
hîng-thé tsá tiō thè sî-kiânn
掛佇窗外竹篙跤
kuà tī thang-guā tik-ko kha
彼領舊衫
hit niá kū-sann
陪我經過日頭熱
puê guá king-kuè ji̍t-thâu jua̍h
冷風刺骨也做伴
líng-hong tshì-kut iā tsuè-phuānn
是新是舊敢有差
sī sin sī kū kám ū-tsha
目睭一?往事過
ba̍k-tsiu tsi̍t-nih óng-sū kuè
心酸只有問歲月
sim-sng tsí-ū mn̄g suè-gue̍h
當初伊嘛真美麗
tong-tshoo i mā tsin bí-lē
風采妖嬌萬人迷
hong-tshái iau-kiau bān-jîn bê
無奈時間一直過
bô-nāi sî-kan it-ti̍t kuè
青春色水漸漸退
tshing-tshun sik-tsuí tsiām-tsiām thè
疼囝絕對無二心
thiànn kiánn tsua̍t-tuì bô gī-sim
世間唯一的母親
sè-kan uî-it ê bó-tshin
舊衫啥人來比並
kū-sann siánn-lâng lâi pí-phīng
我心內永遠最流行
guá sim-lāi íng-uán tsuè liû-hîng
出帆何時會靠岸
tshut-phâng hô-sî ē khò-huānn
他鄉拍拚才知寒
thann-hiong phah-piànn tsiah tsai kuânn
看著窗外大聲喝
khuànn-tio̍h thang-guā tuā-siann huah
思念媽媽
su-liām má-mah
陪我經過日頭熱
puê guá king-kuè ji̍t-thâu jua̍h
冷風刺骨也做伴
líng-hong tshì-kut iā tsuè-phuānn
有你如今才有我
ū lí jû-kim tsiah ū guá
