轉來去
《轉來去》Tńg–lâi-khì
嚴詠能Giâm Īng-lîng
———————————-
彼爿看過去 是咱的故鄉留予你
hit-pîng khuànn kuè-khì, sī lán ê kòo-hiong lâu hōo-lí
金色的稻海 伴著青春歌
kim-sik ê tiū-hái, phuānn tio̍h tshing-tshun kua
遠遠挵著彼支山
hn̄g-hn̄g lòng-tio̍h hit-ki suann
阿爸牽老牛 拖老命 土地公來放伴
a-pah khan lāu-gû, thua lāu-miā, Thóo-tī-kong lâi pàng-phuānn
跤踏實地 揹著汗 有一工欲留予我
kha-ta̍h si̍t-tē, phāinn tio̍h kuānn, ū tsi̍t-kang beh lâu hōo guá
燕仔隨風颺颺飛 借問欲飛去佗 位
ìnn-á suî hong iānn-iānn-pue, tsioh-mn̄g beh pue khì tuē
南爿有一个老土地 不時等你來奉茶
lâm-pîng ū tsi̍t-ê lāu thóo-tē, put-sî tán lí lâi hōng-tê
離鄉拍拚遐濟年
lī hiong phah-piànn hiah tsē nî
上懷念巷仔口的彼碗麵
siōng huâi-liām hāng-á-kháu ê hit-uánn mī
阿伯仔歕雞胿 廟口罔行棋
a-peh–á pûn-ke-kui, biō-kháu bóng kiânn-kî
煙腸擔的火炭味
ian-tshiâng-tànn ê hué-thuànn bī
阿爸笑笑共阮姑情
a-pah tshiò-tshiò kā gún koo-tsiânn
外口嘛無較快活
guā-kháu mā bô khah khuìnn-ua̍h
若有學出師 著愛轉來去
nā ū o̍h tshut-sai, tio̍h-ài tńg–lâi-khì
咱的故鄉需要你
lán ê kòo-hiong su-iàu lí
轉來去 轉來去 故鄉的記持
tńg–lâi-khì, tńg–lâi-khì, kòo-hiong ê kì-tî
當初交予你的彼支鎖匙 一直無換 咧等你
tong-tshoo kau hōo-lí ê hit-ki só-sî, it-ti̍t bô uānn, teh tán–lí
轉來去
tńg–lâi-khì
綴燕仔走揣咱的春天
tuè ìnn-á tsáu-tshuē lán ê tshun-thinn
交換歲月的汗水
kau-uānn suè-gua̍t ê kuānn-tsuí
豐富有機的人情味
hong-hù iú-ki ê jîn-tsîng-bī
轉來去
tńg–lâi-khì
轉來去 轉來去故鄉的記持
tńg–lâi-khì, tńg–lâi-khì kòo-hiong ê kì-tî
當初交予你的彼支鎖匙 一直無換 咧等你
tong-tshoo kau hōo-lí ê hit-ki só-sî, it-ti̍t bô uānn, teh tán lí
轉來去
tńg–lâi-khì
綴燕仔走揣咱的春天
tuè ìnn-á tsáu-tshuē lán ê tshun-thinn
交換歲月的汗水
kau-uānn suè-gua̍t ê kuānn-tsuí
豐富有機的人情味
hong-hù iú-ki ê jîn-tsîng-bī
做陣轉來去
tsuè-tīn tńg–lâi-khì
轉來去 轉來去
tńg–lâi-khì, tńg–lâi-khì
轉來走揣咱的春天
tńg–lâi tsáu-tshuē lán ê tshun-thinn
轉來去
tńg–lâi-khì
