綴我行
《綴我行》Tuè Guá Kiânn
蘇路Soo Lōo(蘇宥蓉Soo Iū-iông)
——————————————
昏暗的路燈
hūn-àm ê lōo-ting
照誰的形影
tsiò siáng ê hîng-iánn
人生的路
jîn-sing ê lōo
就用青春的心
tiō iōng tshing-tshun ê sim
慢慢行
bān-bān kiânn
堅持的目標
kian-tshî ê bo̍k-piau
到底為著啥
tàu-té uī-tio̍h siánn
風聲雨聲
hong-siann hōo-siann
親像一首歌
tshin-tshiūnn tsi̍t-siú kua
流浪的心啊
liû-lōng ê sim–ah
放下一切綴我行
hòng-hā it-tshè tuè guá kiânn
總有一日
tsóng ū-tsi̍t-ji̍t
會知影性命是按怎
ē tsai-iánn sìnn-miā sī-án-tsuánn
流浪的人啊
liû-lōng ê lâng–ah
踏著跤步綴我行
ta̍h-tio̍h kha-pōo tuè guá kiânn
用青春
iōng tshing-tshun
譜出一首歌
phóo tshut tsi̍t-siú kua
孤單的月娘啊
koo-tuann ê gue̍h-niû–ah
微微光線
bî-bî kng-suànn
照著天頂
tsiò tio̍h thinn-tíng
照著溪水
tsiò tio̍h khe-tsuí
照著我心肝
tsiò tio̍h guá sim-kuann
飄浪的一个人
phiau-lōng ê tsi̍t-ê-lâng
毋知孤單
m̄-tsai koo-tuann
有星有月
ū tshinn ū gue̍h
有風綴我行
ū hong tuè guá kiânn
