無根的日頭花
《無根的日頭花》Bô-kin ê Ji̍t-thâu-hue
蘇明淵Soo Bîng-ian
——————————————
起南風的時
khí lâm-hong ê sî
若鼻著故鄉的味
ná phīnn-tio̍h kòo-hiong ê bī
曝粟仔
pha̍k tshik-á
烘龍眼
hang lîng-gíng
懷念的氣味
huâi-liām ê khì-bī
盤山過嶺風微微
puânn-suann-kuè-niá hong bî-bî
心內有酸甘甜
sim-lāi ū sng-kam-tinn
下港來的我
ē-káng lâi ê guá
想厝的心稀微
siūnn tshù ê sim hi-bî
親像無根的日頭花
tshin-tshiūnn bô-kin ê ji̍t-thâu-hue
綴天光轉踅
tuè thinn-kng tńg-se̍h
日頭落山以後
ji̍t-thâu lo̍h-suann í-āu
伊的頭犁犁
i ê thâu lê-lê
我是無根的日頭花
guá sī bô-kin ê ji̍t-thâu-hue
透風落雨的暗暝
thàu-hong lo̍h-hōo ê àm-mî
拍落的花瓣隨風去
phah-lo̍h ê hue-bān suî hong khì
欲飛去佗
beh pue khì tueh
北上遐濟年
pak-siōng hiah tsē nî
定夢著彼節車廂
tiānn bāng-tio̍h hit tsat tshia-siunn
一站過
tsi̍t-tsām kuè
閣一站
koh tsi̍t-tsām
走揣我的夢
tsáu-tshuē guá ê bāng
時間和人走相掠
sî-kan hām lâng tsáu-sio-lia̍h
青春已經過去
tshing-tshun í-king kuè–khì
頭毛猶未白
thâu-mn̂g iáu-bē pe̍h
就鼻無鄉愁的味
tiō phīnn bô hiong-tshiû ê bī
親像無根的日頭花
tshin-tshiūnn bô-kin ê ji̍t-thâu-hue
綴天光轉踅
tuè thinn-kng tńg-se̍h
日頭落山以後
ji̍t-thâu lo̍h-suann í-āu
伊的頭犁犁
i ê thâu lê-lê
我是無根的日頭花
guá sī bô-kin ê ji̍t-thâu-hue
透風落雨的暗暝
thàu-hong lo̍h-hōo ê àm-mî
拍落的花瓣隨風去
phah-lo̍h ê hue-bān suî hong khì
欲飛去佗
beh pue khì tueh
親像無根的日頭花
tshin-tshiūnn bô-kin ê ji̍t-thâu-hue
日子慢慢仔過
ji̍t-tsí bān-bān-á kuè
花謝落塗以後
hue siā lo̍h-thôo í-āu
揣無根佇佗
tshuē-bô kin tī tueh
我是無根的日頭花
guá sī bô-kin ê ji̍t-thâu-hue
就算心內反悔
tiō-sǹg sim-lāi huán-hué
都市的霓虹燈
too-tshī ê nî-âng-ting
永遠照無
íng-uán tsiò bô
回鄉的路
huê-hiong ê lōo
有一日
ū-tsi̍t-ji̍t
我的囡仔問我
guá ê gín-á mn̄g guá
伊的故鄉佇佗位
i ê kòo-hiong tī tó-uī
我雄雄才覺悟
guá hiông-hiông tsiah kak-ngōo
已經佇遮落地生根
í-king tī tsia lo̍h-tē senn-kin
