情批
《情批》Tsîng-phue
蘇路Soo Lōo (蘇宥蓉Soo Iū-iông)
——————————————
八月暝風涼涼仔吹
peh-gue̍h-mî hong liâng-liâng-á tshue
看著清幽的明月
khuànn-tio̍h tshing-iu ê bîng-gue̍h
提著筆寫一張批
the̍h-tio̍h pit siá tsi̍t-tiunn phue
寫袂出一句話
siá buē tshut tsi̍t-kù uē
真濟人攏有講過
tsin tsuē lâng lóng ū kóng–kuè
真情愛無遮好揣
tsin-tsîng-ài bô tsiah hó tshuē
你敢會
lí kám ē
是予我幸福彼一个
sī hōo guá hīng-hok hit tsi̍t-ê
情批寫來寫去
tsîng-phue siá lâi siá khì
猶原是空白
iu-guân sī khàng-pe̍h
敢講暗示感情攏是假
kám-kóng àm-sī kám-tsîng lóng-sī ké
為何你攏無對阮講詳細
uī-hô lí lóng bô tuì gún kóng siông-sè
放阮孤一个
pàng gún koo tsi̍t-ê
情批寫來寫去
tsîng-phue siá lâi siá khì
寫無兩句話
siá bô nn̄g-kù uē
明明心事猶閣遮爾濟
bîng-bîng sim-sū iáu-koh tsiah-nī tsuē
講袂出的話
kóng buē tshut ê uē
寄袂出的批
kià buē tshut ê phue
愛你無機會
ài lí bô ki-huē
