化做千風
《化做千風》Huà-tsuè Tshian-hong
嚴詠能Giâm Īng-lîng
——————————————
我無愛你揣袂著
guá bô-ài lí tshuē buē-tio̍h
我的位置
guá ê uī-tì
就來放棄
tiō lâi hòng-khì
袂記咱捌做陣拍拚
buē-kì lán bat tsuè-tīn phah-piànn
留佇遮的媠
lâu tī tsia ê suí
斟酌影
tsim-tsiok iánn
溫柔也聽
un-jiû iā thiann
咱的喘氣聲
lán ê tshuán-khuì siann
敢有猶原
kám ū iu-guân
恬恬貼佇遮
tiām-tiām tah tī tsia
請你為早起的日頭
tshiánn lí uī tsá-khí ê ji̍t-thâu
準備歡喜
tsún-pī huann-hí
請你陪熱情的海岸
tshiánn lí puê jia̍t-tsîng ê hái-huānn
迎接天星
gîng-tsiap thinn-tshinn
你會看著我
lí ē khuànn-tio̍h guá
笑微微一直無離開
tshiò bî-bî it-ti̍t bô lī-khui
坐著風的翼仔
tsē tio̍h hong ê si̍t-á
踅來踅去
se̍h-lâi-se̍h-khì
我愛你揹著
guá ài lí phāinn tio̍h
喜樂成長的kha-báng
hí-lo̍k sîng-tióng ê kha-báng
一點一滴
tsi̍t-tiám-tsi̍t-tih
付出甘願快活的汗水
hù-tshut kam-guān khuìnn-ua̍h ê kuānn-tsuí
毋通驚
m̄-thang kiann
寬寬仔行
khuann-khuann-á kiânn
千風來做伴
tshian-hong lâi tsuè-phuānn
咱的希望
lán ê hi-bāng
一直攏佇遮
it-ti̍t lóng tī tsia
請你學玉山的花蕊
tshiánn lí o̍h Gio̍k-san ê hue-luí
練習喘氣
liān-si̍p tshuán-khuì
請你綴落山風
tshiánn lí tuè lo̍h-suann-hong
唱一段思雙枝
tshiùnn tsi̍t-tuānn su-siang-ki
你會看著我笑微微
lí ē khuànn-tio̍h guá tshiò bî-bî
陪你無放棄
puê lí bô hòng-khì
化做千風守護你
huà-tsò tshian-hong siú-hōo lí
請你為山頂的囡仔
tshiánn lí uī suann-tíng ê gín-á
揣轉來野球夢
tshuē tńg-lâi iá-kiû bāng
請你閣陪伊搬
tshiánn lí koh puê i puann
幸福的紙風車
hīng-hok ê tsuá-hong-tshia
你會看著我
lí ē khuànn-tio̍h guá
笑微微陪你無放棄
tshiò bî-bî puê lí bô hòng-khì
化做千風守護你
huà-tsuè tshian-hong siú-hōo lí
