信心
《信心》Sìn-sim
蘇世豪Soo Sè-hô
——————————————
若真正是天欲創治人
nā tsin-tsiànn sī thinn beh tshòng-tī lâng
只好認命毋免怨嘆
tsí-hó jīn-miā m̄-bián uàn-thàn
當做是一種考驗
tòng-tsuè sī tsi̍t-tsióng khó-giām
一種承擔
tsi̍t-tsióng sîng-tam
好歹總是一切照起工
hó-pháinn tsóng-sī it-tshè tsiàu-khí-kang
坎坷的人生路
khám-khia̍t ê jîn-sing-lōo
做事條條難
tsuè-sū tiâu-tiâu lân
欲成功
beh sîng-kong
信心是頭一層
sìn-sim sī thâu-tsi̍t-tsân
千萬毋通放棄希望
tshian-bān m̄-thang hòng-khì hi-bāng
咱來做陣拍拚
lán lâi tsuè-tīn phah-piànn
克服困難
khik-ho̍k khùn-lân
䆀䆀馬
bái-bái bé
一步踢
tsi̍t-pōo that
做人愛有價值
tsuè-lâng ài ū kè-ta̍t
提出信心
the̍h tshut sìn-sim
勇敢來完成咱的夢
ióng-kám lâi uân-sîng lán ê bāng
