無情的海岸
《無情的海岸》Bô-tsîng ê Hái-huānn
蘇路Soo Lōo(蘇宥蓉Soo Iū-iông)
——————————————
海風凍阮心肝
hái-hong tàng gún sim-kuann
踮無聊的夜
tiàm bô-liâu ê iā
寂寞毋願來放阮煞
tsi̍k-bo̍k m̄-guān lâi pàng gún suah
一人面對孤單
tsi̍t-lâng bīn-tuì koo-tuann
為你受折磨
uī lí siū tsiat-buâ
稀微的心情
hi-bî ê sim-tsîng
誰知影
siáng tsai-iánn
心愛你的人啊
sim-ài lí ê lâng–ah
是為你心疼
sī uī lí sim thiànn
可憐是
khó-liân sī
你攏毋知影
lí lóng m̄ tsai-iánn
想欲佮你相倚
siūnn-bueh kah lí sio-uá
煞愈行愈散
suah jú kiânn jú suànn
反背當初的咒誓
huán-puē tong-tshoo ê tsiù-tsuā
茫茫無情的海岸
bâng-bâng bô-tsîng ê hái-huānn
啥人為阮疼
siánn-lâng uī gún thiànn
往事像海湧刺激我
óng-sū tshiūnn hái-íng tshì-kik guá
茫茫無情的海岸
bâng-bâng bô-tsîng ê hái-huānn
有愛無心肝
ū ài bô sim-kuann
海鳥笑阮太軟汫
hái-tsiáu tshiò gún thài nńg-tsiánn
看人甜蜜快活
khuànn-lâng tinn-bi̍t khuìnn-ua̍h
幸福黏相倚
hīng-hok liâm sio-uá
何時阮才會看破
hô-sî gún tsiah ē khuànn-phuà
