愛無較縒
《愛無較縒》Ài Bô-khah-tsua̍h
蘇宥蓉Soo Iū-iông(蘇路Soo Lōo)
——————————————
愛情毋是講講的爾爾
ài-tsîng m̄-sī kóng-kóng–ê niâ-niâ
有若無
ū ná bô
就準拄煞
tiō tsún-tú-suah
花開花謝早就看破
hue khui hue siā tsá tiō khuànn-phuà
偏偏對你無較縒
phian-phian tuì lí bô-khah-tsua̍h
愛阮毋通講講的爾爾
ài gún m̄-thang kóng-kóng–ê niâ-niâ
有若無
ū ná bô
咧欲創啥
ti̍h-beh tshòng siánn
月娘笑我為你下性命
gue̍h-niû tshiò guá uī lí hē-sìnn-miā
愛到最後
ài kàu tsuè-āu
相信一切嘛無較縒
siong-sìn it-tshè mā bô-khah-tsua̍h
我為你唱感情歌
guá uī lí tshiùnn kám-tsîng kua
我為你風吹雨寒
guá uī lí hong tshue hōo kuânn
我為你消瘦落肉
guá uī lí siau-sán-lo̍h-bah
你敢會心疼
lí kám ē sim thiànn
山盟海誓的咒誓
san-bîng-hái-sè ê tsiù-tsuā
換做目屎已經流焦
uānn-tsuè ba̍k-sái í-king lâu ta
愛你心甘情願
ài lí sim kam tsîng guān
嘛無較縒
mā bô-khah-tsua̍h
